Ýnıversıtetiniń Baspasóz jáne qoǵammen baılanys bóliminiń jetekshisi Jandar Asannyń aıtýynsha, sharany uıymdastyrýǵa Iassaýı atyndaǵy Halyqaralyq qazaq-túrik ýnıversıtetiniń Eýrazııa ǵylymı-zertteý ınstıtýty men «Bilim Times» jýrnaly da qoldaý kórsetken.
Belgili túrkolog, tuńǵysh qypshaqtanýshy ǵalym Ábjan Quryshjanulynyń ǵylymı eńbekterin zerttep, zerdeleý maqsat etken ǵalymdar basqosýy otandyq jáne sheteldik joǵary oqý oryndarynyń oqytýshylary, ǵalymdar men til mamandary qatysýymen «Túrkitaný ǵylymy jáne túrki tilderiniń ómirsheńdik máseleleri», «Rýhanı jańǵyrý: ádebıet pen mádenıet – ulttyń rýhanı tamyrlary», «Jańartylǵan bilim mazmunyna jańa baǵdar» jáne «Rýhanı jańǵyrý: jańartylǵan bilim júıesindegi ulttyq sananyń kemeldenýi» baǵyttary boıynsha ótti
Eýrazııa ǵylymı-zertteý ınstıtýtynyń dırektory Vakýr Súmer alqaly jıyndy asha otyryp, túrki áleminiń yntymaqtastyǵyn arttyrý baǵyttaryna toqtalsa, ýnıversıtettiń Qazaq til biliminiń teorııasy men ádistemesi kafedrasynyń meńgerýshisi, professor Tynyshtyq Ermekova ǵalymnyń «Kodeks Kýmanıkýske» baılanysty irgeli zertteýlerine toqtalyp, «Ábjan Quryshjanuly esimi berisi – qaımana qazaqqa, arysy – álem túrkitanýshylaryna tanys. Zertteýshilik mol túısigi men qarymdy qalamgerliginiń arqasynda tól tarıhymyzdyń tereńindegi orta ǵasyr eskertkishterin, birqatar túrki jurtyna ortaq muralardy ǵylymǵa engizip, kópshilikpen qaıta qaýyshtyrdy» dep atap ótti.
Abaı atyndaǵy QazUPÝ professory Balqııa Qasym «Ǵalym ǵıbraty», dosent Maıra Júnisova «Ǵalym amanaty», E. Bóketov atyndaǵy Qaraǵandy memlekettik ýnıversıtetiniń stýdenti Nuraı Ǵazızov «Til taǵdyry – kemel keleshek kepili», Abaı atyndaǵy QazUPÝ stýdenti Ádilet Yqylas «Man elementiniń etımologııasy» taqyrybynda baıandama jasady. Basqosýda Túrkııanyń Nııde О́mer Halısdemır ýnıversıteti, E. Bóketov atyndaǵy Qaraǵandy memlekettik ýnıversıteti men Q. Jubanov atyndaǵy Aqtóbe óńirlik memlekettik ýnıversıtetiniń professor-oqytýshylary onlaın jelisinde baılanysqa shyǵyp, paıymdy pikirlerimen bólisti.
Elvıra Serikqyzy,
«Eqemen Qazaqstan»
ALMATY
