Abaı atyndaǵy Qazaq memlekettik akademııalyq opera jáne balet teatrynda ótetin shyǵarmashylyq keshte «Aıgúl» ansambliniń birneshe býyny qatar óner kórsetip, shoqtyǵy bıik ánderdi oryndamaq.
Osydan jarty ǵasyr buryn tyńdarmandarynyń rııasyz qoshemetine bólengen «Aıgúl» ansambli qalaı dúnıege kelip edi?
Endeshe «Qazaq qyzdarynyń parasat mektebi» dep at qoıyp, aıdar taqqan Qazaq ulttyq qyzdar pedagogıkalyq ýnıversıteti 75 jylda joǵary bilikti pedagog mamandar daıarlap qana qoımaı, óner men mádenıet salasynyń damýyna da eleýli úles qosty. Osy jyldar aralyǵynda qarashańyraq oqý orny talaı talanttyń tomaǵasyn sypyryp, darynyn ushtady. Ulaǵat uıasynda myńdaǵan jas bilim alyp, armandaryn asqaqtatyp, qııaǵa qanat qaqty. Shyǵarmashylyq shyńdardy baǵyndyrdy.Elimizdegi mádenıet qyzmetkerleri men ustazdardyń úlken toby osy ulaǵat uıasynan shyńdalyp shyǵyp, búginde ulan-baıtaq Otanymyzdyń túkpir-túkpirinde jemisti eńbek etip jatyr.
Osy oraıda oqý ornynyń stýdentterinen quralǵan «Aıgúl» vokaldy-aspaptar ansambliniń qurylýy qazaq óneriniń tarıhyndaǵy aıtýly qubylys bolǵandyǵy belgili. Ansambl álemniń kóptegen memleketterinde óner kórsetip, elimizdiń mádenıetiniń tanylýyna jáne damýyna eleýli úles qosty.
Álemniń 10-nan astam eliniń úlken sahnalarynda óner kórsetken «aıgúldikterdiń» eren eńbegi eskerýsiz qalmady. Memlekettik syılyqtarmen marapattalyp, «Halyqtyq shyǵarmashyl ujym» ataǵyna ıe boldy. Birneshe baıqaýlarda «júzden – júırik, myńnan – tulpar» shyǵyp, úzdik atandy. Aty ańyzǵa aınalǵan top quramynda óner kórsetken ánshiler búginde esimi elge tanymal tulǵalar.
Sonymen búgin Abaı atyndaǵy Qazaq memlekettik akademııalyq opera jáne balet teatrynda ótetin konsertte «Aıgúl» ansambliniń keshegi arýlary 50 jyl burynǵy tyńdarmandarymen qaıta qaýyshady.
Aınash ESALI,
«Egemen Qazaqstan»
ALMATY
