Bul baǵdarlama Almaty qalasy ákimdiginde baspana alý úshin kezekte turǵan 1 276 almatylyq kópbalaly otbasylardy pátermen qamtamasyz etý máselesin sheshýge kómektesedi. Búginnen bastap olardyń barlyǵy baǵdarlamaǵa qatysý úshin óz ótinishterin arnaıy jasalǵan http://www.baqytty-otbasy.kz saıty arqyly onlaın rejımde berýlerine bolady, dep habarlaıdy «Qazaqstannyń turǵyn úı qurylys jınaq banki» AQ baspasóz qyzmeti.
Qujattar 2019 jyldyń 15 naýryzyna deıin, 5 kún ishinde qabyldanady. Sodan keıin Turǵyn úı basqarmasy ótinishti qarastyryp, «Baqytty otbasy» baǵdarlamasyna qatysýshylardyń tizimin bekitedi.
Bıýdjettik nesıelendirý baǵdarlamasyna qatysýshylar turǵyn úı satyp alý úshin Turǵyn úı qurylys jınaq bankinde («Báıterek» holdınginiń enshiles uıymy) jyldyq 2 paıyz mólsherlememen aldyn ala zaem alýlaryna bolady. Al jeńildetilgen nesıe alý úshin zaem somasynyń 10 paıyzyn quraıtyn mólsherde alǵashqy jarna bolýy qajet. Buǵan qosa, bıýdjettik nesıelendirý baǵdarlamasyna qatysýshy kópbalaly otbasylar Almaty qalasy ákimdiginen quny 1 mln teńgelik turǵyn úı sertıfıkattaryn alady. Bul qarajat zaem alar kezde alǵashqy jarnany óteýge arnalǵan.
Nesıe tek jańa turǵyn úıdi satyp alý úshin beriledi. Zaemnyń eń joǵarǵy somasy 15 mln teńgege teń.
– Memleket basshysy «Nur Otan» partııasynyń XVIII sezinde kóp balaly otbasylardy qoldap, olar úshin qoljetimdi turǵyn úı sanyn arttyryp, turǵyn úı qurylys jınaq júıesi arqyly jeńildetilgen nesıe berý tetikterin daıyndaýdy tapsyrǵan. Qazirgi sátte Qazaqstannyń barlyq óńirleriniń turǵyndaryn qamtıtyn «Nurly jer» baǵdarlamasy boıynsha jańa bir baǵyt ázirlenýde. Almaty qalasynyń ákimdigi jańa erejeniń bekitilýin kútpesten, aldyn ala qalalyq bıýdjetten qarajat bólip, kóp balaly otbasylar úshin «Baqytty otbasy» bıýdjettik nesıelendirý baǵdarlamasyn iske qosty. Jaqyn arada bul otbasylar jalǵa alǵan páterlerinen ózderiniń jeke páterlerine qonys aýdaratyn bolady, – deıdi Turǵyn úı qurylys jınaq bankiniń Basqarma tóraıymy Lázzat Ibragımova.
Almatylyq turǵyndar «Baqytty otbasy» baǵdarlamasy boıynsha páterdi ózderi izdep tabýy tıis. Ol úshin olarǵa bir aı kóleminde ýaqyt beriledi. Páterlerdi izdep tabýǵa Turǵyn úı qurylys jınaq bankiniń qyzmetkerleri kómektesetin bolady. Qazir arnaıy osy úshin banktiń qalalyq fılıalynda barlyq pólshemderge sáıkes satylymǵa qoıylǵan turǵyn úılerdiń tizimi jasaqtalýda.
Eń joǵarǵy somasy 15 mıllıon teńgeni quraıtyn zaem boıynsha nesıeni óteý úshin aıyna 79 000 teńge tóleý qajet bolady. Turǵyn úı qurylys jınaq bankindegi tólemqabilettiligin baǵalaý úderisi jeńildetilgen tártipte ótkiziletin bolady. Baǵdarlamaǵa qatysýshylar nesıeni óteýge qajetti aı saıynǵy tólem somasy men eresek kisige shaqqanda 5 AEK (12 625 teńge) mólsherindegi ómir súrýge arnalǵan eń tómengi somany tóleý úshin jeke tabysynyń jetkilikti ekendigin rastaýy kerek. Tólemqabilettilikti baǵalaý kezinde balalarǵa jumsalatyn shyǵyn túrleri eseptelinbeıdi.
Aınash ESALI,
«Egemen Qazaqstan»
ALMATY
