Aqtaýda erte kóktemde teńiz jaǵasyna shaıylyp shyqqan shaıandar onyń etine qumarlardy qarq qylyp tastar ma edi, eger oǵan tıisti oryndar men tabıǵat janashyrlary aralaspaǵanda?! Teńizde bolǵan qatty jel júzdegen shaıandy tolqynmen laqtyryp jaǵalaýǵa shyǵaryp tastady. Qysqy sýyqtan soń áli kúsh jıyp úlgermegen shaıandardyń óz kúshterimen teńizge jetýi qıyn. Osylaısha «Soldat jaǵajaıy» dep atalatyn tegis jaǵalaýda qaırańdap qalǵan shaıandarǵa qamqorlyq tanytyp, qaıtadan sýǵa salýdyń ornyna keıbireýler arnaıy ydystarmen kelip shaıandardy úılerine tası bastaǵan.
Shaıandardyń jaǵalaýǵa toptap shyǵarylýyn tıisti oryndar – Mańǵystaý oblysy Balyq sharýashylyǵy ınspeksııasy men Mańǵystaý oblysy boıynsha ekologııa departamenti áldebir zań buzýshylardyń qolymen jasalǵan qasaqana uıymdastyrylǵan is emes, tabıǵat áseri, teńizdegi qatty jeldiń áserinen bolyp turatyn jaǵdaı dep túsindirdi. Sonymen qatar oqıǵaǵa baılanysty ekologııalyq zańdylyqty buzý deregi, ony tekserýge qatysty shaǵym túspegendikten, tekserý-tergeý jumystary júrgizilmeıdi.
Tabıǵat janashyrlarynyń aıtýynsha, sáýirden bastap ýyldyryq shashatyn teńiz shaıandaryn úıdi-úıge tasý ábestik. Sondaı-aq keshe ǵana qystan shyqqan, onyń ústine ýyldyryq shashýǵa daıyndalyp júrgen shaıandar erte kóktemde jeý úshin asa qolaıly emes eken. Al kúzgi salym, ásirese tamyz aıynyń sońy men qazan aıynyń sońyna deıin olardyń eti maıly ári dámdi bolmaq.
Jaǵalaýǵa tolqyn uryp shyǵaryp tastaǵan shaıandardy qorǵaýǵa tabıǵatty qorǵaý polıseıleri aralasyp, ydyspen kelgen turǵyndarmen sóılesip, shaıandardy teńizge qaıta jetkizýge qatysty túsindirý jumystaryn júrgizýde.
Gúlaıym ShYNTEMIRQYZY,
«Egemen Qazaqstan»
Mańǵystaý oblysy
