Qazaqstan • 15 Naýryz, 2019

Qazaqstan-Aýǵanstan arasyndaǵy yntymaqtastyq máselesi talqylandy

868 retkórsetildi

Syrtqy ister mınıstri Beıbit Atamqulov Aýǵanstan Islam Respýblıkasynyń Qazaqstan Respýblıkasyndaǵy Elshisi Mohammad Farhad Azımımen kezdesti. Taraptar saıası, saýda-ekonomıkalyq jáne gýmanıtarlyq salalardaǵy Qazaqstan-Aýǵanstan yntymaqtastyǵynyń qazirgi jaǵdaıy men keleshegin talqylady.

«Ortalyq Azııa aımaǵyndaǵy ıntegrasııalyq prosester sheńberinde Aýǵanstanmen yntymaqtastyq, ekijaqty jáne kópjaqty formattaǵy qatynastardyń barlyq spektri boıynsha yntymaqtastyqty damytý bizdiń qarym-qatynastarymyzǵa oń áserin tıgizedi. Qazaqstan kóptegen jyl boıy Aýǵanstandaǵy beıbitshilik prosesine jáne qaıta qalpyna kelýine úles qosyp keledi», - dedi mınıstr.

Qazaqstan men Aýǵanstan arasyndaǵy ózara tıimdi qarym-qatynastyń progressıvti dınamıkasy, sondaı-aq ózara saýdadaǵy kórsetkishterdiń ósýi baıqalady. Sonymen birge saýda-ekonomıkalyq yntymaqtastyqtyń áleýeti zor ekendigi atap ótildi.

Qazaqstan astyqty jáne onyń ónimderin Aýǵanstanǵa eksporttaýǵa, tranzıttik-kólik jáne gýmanıtarlyq salalardaǵy ózara is-qımyldy nyǵaıtýǵa, Aýǵanstandaǵy temirjol jáne ınfraqurylymdyq jobalardy iske asyrýǵa, sondaı-aq, Aýǵanstan azamattaryna arnalǵan Qazaqstannyń bilim berý baǵdarlamasyn jalǵastyrýǵa múddeli. Áskerı-tehnıkalyq yntymaqtastyq - ekijaqty yqpaldastyq aspektileriniń biri bolýy múmkin.

О́z kezeginde Aýǵanstan elshisi Qazaqstan Prezıdenti Nursultan Nazarbaevqa óz eline nazary úshin alǵysyn bildirdi. «Biz Aýǵanstandy damytýdaǵy Qazaqstannyń rólin joǵary baǵalaımyz. BUU Qaýipsizdik Keńesiniń turaqty emes múshesi kezinde sizdiń memleket Keńes delegasııasynyń Qabylǵa alǵashqy saparyn uıymdastyrdy. Biz ortaq shekaralardyń joqtyǵyna qaramastan, Qazaqstandy elimizdiń jaqyn dosy retinde sanaımyz», - dedi M.Azımı.

Aýǵan dıplomaty óz eliniń basshylyǵy atynan Qazaqstan men Aýǵanstan arasyndaǵy qarym-qatynastardy strategııalyq deńgeıge kóterýge jáne bul maqsatta tıisti kelisimge qol qoıýǵa múddelilik tanytty. Elshiniń aıtýynsha, Aýǵanstan О́zbekstanmen jáne Túrkimenstanmen uqsas kelisimderge qol qoıǵan.

Aýǵanstannyń beıbit qurylysyna úles qosyp jatqan qazaqstandyq ýnıversıtetterde azamattyq mamandyqtar boıynsha bilim alǵan aýǵan stýdentteriniń mańyzdy róli atap ótildi. Osyǵan baılanysty aýǵan tarapy bilim berý granttarynyń sanyn kóbeıtý týraly ótinish bildirdi. 2010 jyldan bastap 2021 jylǵa deıingi kezeńde qazaqstandyq joǵary oqý oryndarynda Aýǵanstannyń 1 myńnan astam azamaty bilim alady.

Aýǵanstan Elshisi Aýǵanstan aýmaǵynda ekijaqty iskerlik baılanystardy damytýǵa, sondaı-aq, qazaqstandyq bıznestiń Aýǵanstandaǵy jobalarǵa belsendi qatysýyna yqpal ete alatyn, Almaty men Qabyl arasynda tikeleı áýe reısterin qaıta jańǵyrtýǵa múddeli ekendigin aıtty.

M.Azımı ekijaqty saýdany tilge tıek ete otyryp, Qazaqstannyń óńirdegi Aýǵanstan úshin eń iri saýda áriptesi ekendigin atap ótti. Aýǵan bılikteri qazaqstandyq kompanııalardyń Aýǵanstandaǵy ken oryndaryn ıgerýge qatysýyn qosa alǵanda, birlesken jobalarǵa barynsha qoldaý kórsetýge daıyn ekendigin málimdedi.

2018 jyly Qazaqstan men Aýǵanstan arasyndaǵy taýar aınalymy 520,6 mln dollardy qurady, onyń ishinde eksport - 516,4 mln dollar, ımport - 4,2 mln dollar.

Aıta keterlik jaıt, Qazaqstannyń «Integra» kompanııasy 43 km «Gerat – Haf» temir jolyn salý jónindegi tenderdi jeńip alǵan bolatyn.

Sońǵy jańalyqtar

Elimizde indet juqtyrǵandar sany 500-ge jetti

Koronavırýs • Búgin, 09:19

Juma: Almatyda 28 indet oshaǵy karantınde tur

Ońtústik Qazaqstan • Keshe

Almatyda zerthanalar sany artady

Ońtústik Qazaqstan • Keshe

Uqsas jańalyqtar