Qarapaıym zattar ekonomıkasyn damytý aıasynda Úkimet halyq tutynatyn taýarlardy, sondaı-aq shıkizat pen bastapqy qaıta óńdeý ónimderin óndirýdi qoldaıdy. Bul tásil tolyq qosylǵan qun tizbekterin arttyrýdy qarastyrady. Bul týraly Úkimet úıinde ótken brıfıngte Indýstrııa jáne ınfraqurylymdyq damý mınıstri Roman Sklıar aıtty. Bul maqsattarǵa Úkimet bólgen 600 mlrd teńge ónerkásip óndirisi men agroónerkásip keshenin damytýǵa jáne qoldaýǵa baǵyttalatyn bolady.
Mınıstr Roman Sklıar atap ótkendeı, baǵdarlama nátıjesinde 2025 jylǵa qaraı barlyq 365 ónimniń óndiris kólemi 2,4 esege artyp, naryqtaǵy ımporttyń úlesi 59%-ten 37%-ke deıin tómendeıdi. Olardyń ishinde 247 azyq-túliktik emes ónerkásip ónimderi boıynsha óndiris 1,5 mlrd dollardan 3,1 mlrd dollarǵa deıin (nemese 2 esege) ósedi jáne ımport úlesi 82%-ten 59%-ke deıin tómendeıdi dep kútilýde. Taýarlardyń tizimi kelesi krıterılerdi eskere otyryp, aıqyndaldy. Atap aıtqanda, ımportqa táýeldiliktiń joǵarylyǵy (5 mln. dollardan astam), otandyq shıkizattyń qoljetimdiligi, qajetti quziret pen tehnologııa bar, qaıta óndirýdiń bolmaýy, taýar sapasyn baǵalaıtyn synaq bazasynyń bolýy sııaqty erekshelikter eskerilip otyr.
«Úkimet halyqqa qajet daıyn shıkizat óndirisin ǵana emes, qajetti shıkizat pen bastapqy óńdeý ónimderin óndirýdi qoldaıdy. Bul tásil qosylǵan qun tizbekterin arttyrýǵa arnalǵan. Mysaly, «qant qyzylshasy – qant – kondıterlik ónimder», «jemdik daqyldar jáne iri qara mal – jas et jáne qatyrylǵan et – etpen tez daıyndalatyn taǵamdar men shujyq ónimderi» jáne taǵy basqalar. Balamaly túrde azyq-túlik ónimderine jatpaıtyn taýarlardy da damytý qarastyrylyp otyr. Mysaly, oǵan «maqta – mata – kıim-keshek» sııaqty ónimder jatady», - dep habarlady mınıstr.
IIDM basshysynyń aıtýynsha, jeńil jáne jıhaz ónerkásibi men qurylys materıaldaryn damytýdyń jol kartalary ázirlenip, bekitildi. «Qarapaıym zattar ekonomıkasynyń» negizgi taýarlary osy salalarǵa jatady.
Shıkizatpen qamtamasyz etýde joǵary marjınaldy ónimderdi óndirý úshin qajetti shıkizat bazasyn damytý sharalary qarastyrylǵan. Jeńil ónerkásipte maqta, jún óńdeý, jasandy jáne sıntetıkalyq materıaldardy óndirýdi yntalandyrý. Qurylys materıaldary boıynsha elimizdiń shıkizat áleýetin taldaý joǵary sapaly ónimder óndirý úshin júrgiziletin bolady. Sonymen qatar, ishki naryqty qorǵaý úshin kedendik ákimshilendirý men tehnıkalyq retteý quraldaryn jetildirý josparlanyp otyr. Osy salalardyń ónimderin satýdy ulǵaıtý úshin jáne qoldanystaǵy kásiporyndardyń júktemesin arttyrý maqsatynda retteletin satyp alýlarda qazaqstandyq qamtý úlesin jyl saıyn 20 paıyzdyq tarmaqqa ulǵaıtý usynylady. Ishki naryqta otandyq ónimderdi nasıhattaý jáne olardyń halyqqa qoljetimdiligin arttyrý máselesinde otandyq taýarlardyń bólshek jelilerde usynylýyn arttyrý sharalary ázirlenedi. Kásiporyndardy joǵary bilikti kadrlarmen qamtamasyz etý aıasynda memlekettik bilim berý tapsyrysyn jasaýda bıznestiń salalyq qajettilikteri eskeriletin bolady. Sondaı-aq, aldyńǵy qatarly tehnologııalardy paıdalanyp, atalǵan jobalardy iske asyrý úshin osy salalarǵa ınvestısııa tartý sharalary jasalatyn bolady.
