Jańa meshit EKSPO qalashyǵynyń aýmaǵynda turǵyzylýda. Onda bir mezette 30 myń adamnyń qulshylyq etýine múmkindik bolady. Onyń ishinde áıelderge arnalǵan 3000 oryn bar. Ǵımarattyń jalpy kólemi 57 myń sharshy metrdi quraıdy, al munarasynyń bıiktigi 130 metrge jetkizilmek. Sondaı-aq kúmbeziniń dıametri – 63 metr.
Elbasy osynaý ulyq istiń Naýryz aıynyń qarsańynda bastalýyn jaqsylyqqa jorıtynyn aıtty. Memlekettik bıýdjetten meshit qurylysyna qarjy bólinbeıdi.
– Bul el táýelsizdiginiń qarsańynda ótken úlken májilisterdiń birinde josparlanǵan jumys edi. Meshit salý úshin arnaıy qor qurylyp, elimizdiń belgili kásipkerleri men qarapaıym azamattary qarjylaı úles qosýda. Qazaqstannyń táýelsizdik jyldarynda eldiń saıasatynyń arqasynda ósip-ónip, bıznesin órkendetken azamattardyń bir toby qurylystyń bastalý rásimine de qatysyp otyr, – dedi Elbasy.
Memleket basshysy, sonymen qatar jańa meshit dinı ǵımarat bolyp sanalǵanymen, Astananyń eń bir kórikti ári týrısterdi baýrap turatyn ǵımarat tarynyń biri bolatynyn jetkizdi.
– Men taıaýda BAÁ-de bolyp, altynnan turǵyzylǵan sheıh Zaıd meshitin kórdim. Bul meshit 3-4 jyl buryn ǵana ashylsa da, oǵan jyl saıyn 6 mıllıon týrıst barady. Alla isimizge bereke bersin. Urpaqtarymyzdyń bolashaǵy jarqyn bolsyn, – dedi Memleket basshysy.
Jospar boıynsha meshit qurylysy eki jyl ishinde aıaqtalýy tıis. Al qurylystyń ýaqytyly jáne sapaly júrgizilýi Memleket basshysynyń tikeleı baqylaýynda bolady. Prezıdenttiń aıtýynsha, meshit jobasyn bekiter kezde álemdegi úzdik meshitterdiń artyqshylyqtary elep-ekshelip, eń úzdigine tańdaý jasalǵan.
Qala ákimdiginiń jospary boıynsha elordanyń Bas meshitiniń qaptalynan kólemi Botanıkalyq baqtan da úlken saıabaq oryn tebedi.
Meshit qurylysyna tapsyrys berýshi «Astana-2020» qorynyń atqarýshy dırektory Nurjan Myńjasarovtyń aıtýyna qaraǵanda, qulshylyq úıine álemdegi eń zamanaýı materıaldar paıdalanylmaq.
Meshittiń aýmaǵynda 3500 kólikke arnalǵan jabyq jáne ashyq avtoturaqtar qarastyrylǵan.
– Bul meshit Ortalyq Azııa men TMD memleketteriniń ishindegi eń alyp jáne biregeı meshit bolýy tıis, – dedi jýrnalısterge suhbat bergen N.Myńjasarov.
Endi 24 aıdan soń Astanaǵa áýejaıdan keler tusta eń bir sáýletti meshit jamaǵatqa esigin aıqara ashady.
Qurylysqa jaýapty kompanııa ókilderi jumystyń eń qyzǵan tusynda bir mezette shamamen 2,5 myńdaı qurylysshy tartylatyndyǵyn aıtyp otyr.
Jaýapty jumystyń mańyzdylyǵy men jaýapkershiligi qazirdiń ózinde qajetti qurylys kólikteriniń tizilip qoıylǵanynan da ańǵaryldy.
Sondaı-aq, Memleket basshysy Qazaqstan musylmandary dinı basqarmasyna bardy.
Nursultan Nazarbaev elordanyń Almaty aýdanyndaǵy Qazaqstan musylmandary dinı basqarmasynyń jańa ǵımaratyn aralap kórdi.
Memleket basshysy Qazaqstan musylmandary dinı basqarmasynyń qazirgi jumysymen jáne aldaǵy josparymen tanysty, sondaı-aq qyzmetkerlermen áńgimelesti.
– Sizderdiń jumystaryńyz úshin barlyq jaǵdaı jasaldy. Biz sizdermen birge halyqtyń ıgiligi úshin eńbek etemiz. Eger memlekette birlik pen kelisim bolmasa, ondaı eldiń bolashaǵy joq, – dedi Qazaqstan Prezıdenti.
Nursultan Nazarbaev jıynǵa qatysýshylardy kele jatqan Naýryz meıramymen quttyqtap, Dinı basqarmanyń jumysyna tabys tiledi.
* * *
«Nurly Astana» korporatıvtik qory Qazaqstan musylmandary dinı basqarmasy jańa ǵımaratynyń qurylysyn 2015 jyldyń qazan aıynda bastap, 2018 jylǵy jeltoqsanda aıaqtady.
Serik ÁBDIBEK,
«Egemen Qazaqstan»
