Elimizde, sonyń ishinde astanalyq aǵaıyn qoǵamdyq kólikti jıi paıdalanady. Alaıda, kútken avtobýsyń keıde ýaqytynda kelmeı, yzańdy keltiredi. Ony aıtasyz, elordada bir jerge jetýińniń ózi kádimgideı muń. Jo-joq, obaly ne kerek, avtobýstar aǵylyp júrip jatyr. Bir qyzyǵy, qoǵamdyq kólik kóp bolǵanymen, dál sen baratyn kóshege álgi avtobýstardyń biri de qatynamaıdy. Mysal kerek pe?
Sol jaǵalaýǵa jetkenshe...
Máselen, elordadaǵy Abaı dańǵylymen qıylysatyn Jubanov, Brýsılovskıı, Beısekbaev, Sembınov kósheleriniń tusynan, quddy kelisip alǵandaı-aq, sol jaǵalaýǵa eshqandaı avtobýs júrmeıdi. Tek Kenesary kóshesimen sol jaǵalaýǵa jalǵyz №40 avtobýs qatynaıdy. Alaıda, qalany túgel aralap, shamamen 1 saǵatta áreń jetesiń nemese №70 avtobýsqa minesiń. Ol úshin Ýálıhanov kóshesine jetip alý kerek. Qos baǵyttaǵy qoǵamdyq kólikterdiń eski ekeni, turǵyndarǵa qolaısyz ekeni bólek áńgime.
Al №40 avtobýstyń «tasbaqa júrisine» shydamaıtyn, №70 avtobýsqa jete almaıtyn keı turǵyn ne isteıdi? Amalynyń joqtyǵynan №60 avtobýsqa júgiredi. Onyń ózine joǵaryda atalǵan kóshelerden «Otyrar kitaphanasy» ornalasqan Pýshkın kóshesine jaıaýlap barý kerek. Áıtpese «ákeleriniń qunyn surap» júretin taksıge júginesiń. Olar sol jaǵalaýǵa 1000 teńgeden tómen baǵaǵa aparmaıdy.
Sondaı-aq «Jastar», «Selınnyı» aýdandary men Ýálıhanov kóshesinen Abaı-Brýsılovskıı, Abaı-Jubanov kóshelerine eshqandaı qoǵamdyq kólik júrmeıdi. Bul úshin birneshe avtobýsqa minip jetý kerek.
Jyly aıaldamany jyldap kútesiń
Avtobýsty aýyzǵa alǵan soń, aıaldama týraly aıtpaı kete almaısyń. Búrseń qaqqan jolaýshylar elorda ákimdiginiń «jyly aıaldama salyp beremiz» degen ýádesin kútkenine az bolǵan joq. Endi, mine, kóktemmen kórisip jatyr. Obaly ne kerek, sol jaǵalaý kóshelerine jyly aıaldamalardy jaınatyp qoıǵan. Al oń jaǵalaý turǵyndary, ádettegideı, búrseń qaǵyp júr.
Byltyr qazan aıynda Astana ákimdiginiń ókili Rýslan Ábdýálıev birneshe mıllıon teńge turatyn jyly aıaldamalardyń qoldanysqa qashan beriletini týraly aıta kele: «Qazirgi tańda qurylys-montajdaý jumystary júrgizilip jatyr. Elektr toǵy áli tartylmaǵandyqtan, ol aıaldamalarda ázirge jylý joq. Dál qazir ony iske qosý týrasynda «Energosbyt» jáne AREK-pen kelisip jatyrmyz. Qajetti jumystar júzege asyrylǵannan keıin pavılondar ashylatyn bolady», - degen-di.
Uzyn sózdiń qysqasy, qalanyń joǵaryda mysalǵa keltirgen kósheleri ornalasqan Baıqońyr aýdanynyń avtobýs baǵyttaryn qaıta qaraıtyn kez jetken sekildi. Áıtpese álgi aýdannan sol jaǵalaýǵa baratyn turǵyndarǵa qolaısyz ekeni anyq.
Ǵanıbet ǴALYMBEKULY,
«Egemen Qazaqstan»
