Aldyn ala derekter boıynsha 22 bala men eki eresek adam aýrýhanaǵa jatqyzylǵan. Bárinen birdeı sımptomdar ıaǵnı, bas aınalýy, bas aýrýy, kózdiń shyryshty qabyǵynyń titirkenýi baıqalǵan.
«Barlyǵyna medısınalyq kómek kórsetildi. Gaz kompanııasynyń qyzmetkerleri mektep pen avtonomdy qazandyqty muqııat tekserip, tabıǵı gazdyń syrtqa shyǵýyn tekserdi, biraq eshteńe tappady. Ýlaný tek bir ǵana synypta emes, ártúrli synyp oqýshylarynda baıqaldy. Bólmede jáne mektep alańynda jaǵymsyz ıis sezilgen. Balalardyń jaǵdaıy alańdaýshylyq týdyrmaıdy. Keıbir oqýshylar aýrýhanadan shyǵarylyp, úılerine qaıtaryldy», dedi Shymkent qalalyq bilim bóliminiń basshysy Aqerke Abylaıhan.
Oqıǵa ornyna barlyq tótenshe jaǵdaılar qyzmetteri: Tótenshe jaǵdaılar departamenti, polısııa, dárigerler, gaz qyzmetteri jumys istedi. Ýlaný sebepteri áli anyqtalmady.
Aıta keteıik, qalalyq densaýlyq saqtaý basqarmasynyń baspasóz qyzmeti ókilderiniń sońǵy málimeti boıynsha, qazir 36 adam ýlaný belgilerimen aýrýhanada jatyr. Onyń ishinde 34 oqýshysy, bir pedagog jáne tehnıkalyq qyzmetker zardap shekken. 24 adamǵa kómek kórsetilip, úılerine jiberildi. Qalǵandary em alyp jatyr.
