Jınalǵan kópshilik jyl basynyń basty dámi – Naýryz kójeden dám tatty. Kúbiden túsken maı men tabada pisken ystyq nan, baýyrsaqtan aýyz tıdi. Aqsaqaldardyń aq batasyn alǵan kósh-kerýendi Shymkent qalasy ardagerler keńesiniń tóraǵasy Isamýddın Rysbaı men ardager jýrnalıst Baıdýlla Qonysbek bastap shyqty. Merekelik is-sharada qalalyq Qazaqstan halqy Assambleıasy tóraǵasynyń orynbasary Muratáli Qalmuratov, qoǵam qaıratkeri Baıdýlla Qonysbek jurtshylyqty Ulystyń Uly kúnimen quttyqtap, izgi nıetterin bildirdi.
– Naýryzdyń tarıhy 5 myń jyldan jalǵasyp keledi. Bul mereke Orta Azııa memleketterinde keń kólemde toılanady. IýNESKO kóleminde 2009 jyldan beri búkil dúnıejúzilik mereke bolyp atalyp keledi. Búgin de Salt-dástúr ortalyǵy men Qazaqstan halqy Assambleıasynyń uıytqy bolýymen osynaý ıgi is-shara ótýde. Elimizdiń yrysy mol bolsyn! Qazaqstandy mekendeıtin 100-den asa etnos ókilderiniń tatýlyǵy berik bolsyn! – dedi M.Qalmuratov.
Birinshi qatarda qos túıe, odan keıin kúımeler, attylardyń sońynan jastar qaz-qatar tizbektelip, «Aq búrký» rásimin ótkizý úshin dendrosaıabaqqa toqtady. Qala turǵyndaryna merekelik kóńil-kúı syılaýdy kózdegen kerýenshiler jol-jónekeı halyq ánderi men kúılerinen shashý shashyp, baýyrsaq taratty.
Aıryqsha sán-saltanaty jarasqan kósh-kerýen sońynda Qazaqstan halqy Assambleıasy ǵımaratynyń aldyna taban tiredi. Arnaıy dastarhan jaıyp, qala turǵyndaryna Naýryz kóje taratyldy. Sondaı-aq túrki halyqtarynyń Naýryzdy toılaýdaǵy erekshelikterin aıshyqtaıtyn kórme men konserttik baǵdarlama jurtshylyqtyń nazaryna usynyldy.
