Onyń jarqyn mysalyn ótken jyly Alakól, Qarasaı, Talǵar aýdandarynda ashylǵan 3 birdeı ámbebap dene shynyqtyrý-saýyqtyrý kesheniniń paıdalanýǵa berilýinen baıqaý bolady. Al bıyl bul jumys jemisti jalǵasýda. Jalpy Jetisý óńirinde 2022 jylǵa qaraı barlyq aýdan ortalyqtary men iri eldi mekenderde dene shynyqtyrý-saýyqtyrý keshenderi iske qosylatyn bolady.
Qazir Almaty oblysynyń Qarasaı aýdanynda eki dene shynyqtyrý-saýyqtyrý kesheniniń qurylysy júrip jatyr. Aýmaǵy 3660 sharshy metrdi alyp jatqan zamanaýı nysannyń biri Raıymbek aýyldyq okrýiginde salynýda. Eki qabattan turatyn ǵımaratta boks pen kúreske arnalǵan jattyǵý alańy, voleıbol, basketbol, gandbol jáne mınıfýtbol zalynan bólek kıim aýystyryp, jýynatyn bólme ornalaspaq.Sondaı-aq, kelýshilerge qyzmet kórsetetin saýna, massaj bólmesi, bılıard zaly men 60 adamǵa laıyqtalǵan kafeterıı sııaqty qosymsha oryn da ashylmaq. Aýyl turǵyndarynyń sportpen shuǵyldanyp, demalysyn kóńildi ótkizýge sep bolatyn saýyqtyrý keshenininde túrli jarys ótkizýge arnalǵan alań men 300 adam sııatyn kórermen trıbýnasy da bar.
Al Shamalǵan aýylynda boı kótergen ekinshi dene shynyqtyrý-saýyqtyrý kesheniniń aýmaǵy 7300 sharshy metr eken. Nysan 6 bloktan turady. Voleıbol, basketbol, gandbol jáne mınıfýtbolǵa arnalǵan ámbebap zalda jarys tamashalaý úshin 300 oryndyq jeke trıbýna bolady. Shyǵys jekpe-jegi, boks, kúres sııaqty sport túrlerine arnalǵan jattyǵý zalyna japsarlas 160 adamdyq kórermen zaly bólek salynýda. Júzý basseınine de suranys kóp bolatyn túri bar. Bul keshen bir mezgilde 300 adamnyń sportpen shuǵyldanýyna múmkindik bermek.
Jalpy, bıyl jyl sońyna deıin Qarasaı ólkesinen bólek Aqsý, Kóksý, Kegen, Raıymbek aýdandary men Qapshaǵaı qalasynda da dene shynyqtyrý-saýyqtyrý kesheni salynyp bitip, iske qosylmaq. Qyzý jalǵasqan qurylystyń tórteýi memleket pen jekemenshik áriptestiginiń negizinde bastalǵan eken.
Qalmahanbet MUQAMETQALI,
«Egemen Qazaqstan»
Almaty oblysy
