Halqymyzdyń ulttyq ónerinde óshpes iz qaldyryp, sholpan juldyzdaı jarqyrap ótken jerles aqyn, aýdarmashy Erik Asqarovtyń týǵanyna 60 jyl tolý mereıtoıy qurmetine oraı uıymdastyrylǵan ıgi sharaǵa marqumnyń aıaýly jary Násipjan Mediqyzy, kózin kórgen zamandas aıtysker aqyndar, zııaly qaýym ókilderi qatysty.
«Bizdi óner, onyń ishinde aıtys tabystyrdy. Erik jan-jaqty daryn ıesi bolatyn. Dramatýrgııaǵa da qalam terbedi. Aýdarmaman de aınalysty. Desek te poezııa álemindegi qoltańbasy aıryqsha-tuǵyn» dedi jan jary.
Osydan eki jyl buryn jas ári talapty balalarǵa esigin aıqara ashqan oblystyq aqyndar mektebiniń tárbıelenýshileri kóptegen músháıra men aıtystarǵa qatysyp, jaqsy qyrynan tanylyp júr. Endi mektep aıtystyń aqtańgeri Eriktiń esimin ıelenip, jańa formatpen túrlenedi.
«Kórkemsóz» baǵyty boıynsha tálimger, S. Muqanov atyndaǵy qazaq sazdy-drama teatrynyń kórkemdik jetekshisi Batyrbek Shambetovtyń aıtýynsha, munda mektep oqýshylary, stýdentter aqyndyq ónerdiń qyr-syryn meńgeredi. Sonymen qatar jazba aqyndar, músháıra aqyndary, kórkem sóz oqý úıirmeleri jumys isteıtin bolady.
«Erik orny tolmas aqyndardyń biri. 40-tan endi asyp, naǵyz babyna kelgen shaǵynda mezgilsiz opat boldy. Men qazaq teledıdaryna ádebı dramalyq habarlardyń bas redaktory bolyp kelgenimde qaramaǵymda rejısser bolyp 5-6 jyl jumys istedi. Keıin talantty jazba jáne aıtysker aqyn retinde ózin moıyndatty. «Er jigitke jeti óner de az» demekshi, ol san qyrly tulǵa bolatyn» dedi jurtshylyq aldynda tebirene sóılegen Aıtyskerler jáne jyrshy-termeshilerdiń halyqaralyq odaǵynyń tóraǵasy, Qazaqstannyń eńbek sińirgen qaıratkeri Júrsin Erman.
Aqyndar mektebi men aýdıtorııanyń saltanatty ashylýy «Qaıyń de meni kóshpeıtin elimnen» atty respýblıkalyq ǵylymı konferensııaǵa jalǵasty. Onda Erik Asqarovtyń ómiri men shyǵarmashylyǵyna arnalǵan baıandamalar oqylyp, oblys ortalyǵyndaǵy kóshelerdiń birine aqynnyń esimin berý týraly usynys biraýyzdan qoldaý tapty.
О́mir ESQALI
«Egemen Qazaqstan»
Soltústik Qazaqstan oblysy
