«Qostanaı qalasyndaǵy Mamandandyrylǵan halyqqa qyzmet kórsetý ortalyǵynyń aýmaǵynda eki azamat qala turǵyndaryn kútip alyp, olarǵa avtokóligin qaıta tirketkende «jaqsy» nomer alyp berý úshin 35 myń teńge suraǵan. Bul fakt boıynsha Jeke qaýipsizdik basqarmasynda QR QK 2-babynyń 2-bólimi boıynsha (top adamdardyń aldyn ala kelisip jasaǵan alaıaqtyq áreketi) qylmystyq is qozǵaldy. Kúdiktiler qylmysyn moıyndap, istegen isine ókinish bildirdi» dedi polısııa podpolkovnıgi Altynbek Shúıinshálıev.
Basqarma basshysynyń aıtýynsha, mundaı alaıaqtyq jaǵdaılardan qyzmetti sıfrlandyrý men avtomattandyrý ǵana qutqarady. Ishki ister mınıstri Erlan Turǵymbaevtyń tapsyrmasymen bul jumystar jalǵasyp jatyr. Mamandandyrylǵan halyqqa qyzmet etý ortalyǵynda azamattardyń jumysy 20-30 mınýtta oryndalady. О́tken jyldan beri kýáligin aýystyrýdy jáne mashınasyn qaıta tirketýdi elektrondyq úkimet portalyndaǵy «onlaın» rejımde úıde otyryp-aq jasaýǵa bolady.
«Sondyqtan sıfrlandyrý alaıaqtyqpen kúresýdiń eń tıimdi tásili. Azamattarǵa tegin qyzmet úshin aradaǵy deldaldarǵa aqy tólemeý kerek ekenin aıtýdaı aıtyp kelemiz» deıdi Altynbek Shúıinshálıev.
Jyl basynan beri Qostanaıda kólik júrgizý kýáligin 168 adam elektrondyq úkimet portaly arqyly alǵan. 2018 jyly Mamandandyrylǵan halyqqa qyzmet kórsetý ortalyǵynda 34029 kýálik berilgen, 73161 qyzmet kórsetilgen.
Názıra JÁRIMBET,
«Egemen Qazaqstan»
Qostanaı
