Keshegi kún máńgilik el tarıhyndaǵy aıryqsha máni bar kún bolady. Tarıhı oqıǵanyń tańdandyrǵany da, tańyrqatqany da ras. Estigen sátte esimizdi jınaı almaı qaldyq. Sol bir sátte táýelsiz eldiń alǵashqy kezeńinen bastap kúni búgingi kemeline kelip, sharshysyna tolyp, álemniń damyǵan elderimen ıyq tirestirgen tusyna deıingi tarıhı jolǵa oı júgirtip, sanamen salmaqtaǵanymyzdy nesine jasyraıyq.
Toqsanynshy jyldardyń basynda Keńes ókimeti kelmeske ketkennen keıin burynnan bir-birimen tyǵyz baılanystaǵy ekonomıkalyq júıe ydyrap, qıyn kúnderdi basymyzdan keshtik. Ásirese aýyl sharýashylyǵy múlde turalap qaldy. Qora tolǵan tórt túlik maldy barter degen pále jutty. Janar-jaǵarmaıdyń bir tonnasyn 4-5 tonna altyn astyqqa aıyrbastap júrdik. Jalǵyz biz ǵana emes, uzaq jyl keńsharlardy basqarǵan aýyl sharýashylyǵynyń múıizi qaraǵaıdaı mamandary tyǵyryqtan shyǵar jol tappaı, teńselip ketti. Mine, osy sátte el ekonomıkasynyń kúre tamyry – aýyl sharýashylyǵyna Elbasy Nursultan Nazarbaev jiti nazar aýdaryp, Úkimet tarapynan qyrýar kómek kórsetildi. Sol kómektiń arqasynda turalap qalǵan aýyl sharýashylyǵy qaıtadan ujymdasa uıysyp, joqtan bar qurap, eńsesin kótere bastady. Endi qarańyz, sońǵy jyldary Aqmola oblysy respýblıka astyǵynyń úshten birin beretin jaǵdaıǵa jetti. Oblystyń qara malynyń qaq jartysy ónimdiligi joǵary asyl tuqymdy malǵa aınaldy. Qus fabrıkasy deısiz be, taýarly sút fermalary deısiz be, birinen soń biri boı kóterip, Elordany azyq-túlikpen qapysyz qamtamasyz etip qana qoımaı, astyǵymyzdy, etimizdi shetelge shyǵaratyn múmkindikke qol jetkizdik. Osynyń barlyǵy jasyratyny joq, halqyn jumylǵan judyryqtaı sońynan ertip, armandaı alys bolashaqtyń berekeli bıikterine bastaı bilgen Elbasy Nursultan Nazarbaevtyń arqasy! Muny yrysy mol bolǵanymen, áýresi belden keletin aýyl sharýashylyǵy salasynyń qajýdy, aryp-ashýdy bilmeıtin eńbekkerleri jaqsy biledi. Aqtyly mal ósirip, aqyq dán aıalaǵan jurt dastarqandaryn toqshylyqqa aınaldyra bilgen Elbasyna aıtar alǵystary sheksiz. Osy jyldar ishinde keleshegin boljaı bilgen kenen aqyldy, kemel parasatty Elbasymyz aýyl sharýashylyǵyn álemniń eń ozyq memleketteriniń tabysymen taıtalasa alatyn tamasha bıikke kóterdi.
Molshylyqtyń bastaýy Elbasynyń kóregen saıasatynyń nátıjesi. Tuńǵysh Prezıdentimiz bizdiń salanyń búge-shigesin óte jaqsy bildi. Sol bilgeniniń arqasynda búgingi kúnniń talaptaryn túısinip, aldymyzdan sara jol ashty. Qazirgi kúni bizdiń sharýa qojalyǵymyz bir myń gektar jerge egin egedi. О́zińiz oılap qarańyz, bir ǵana otbasynyń ıeligindegi qojalyqta bir myń gektar jerge egin egýge qol jetkizý úshin qanshama múmkindik týdyrylýy kerek. Sol múmkindikti bizdiń memleketimiz týdyrdy, Elbasymyz týdyrdy. Muny ekpin túsirip, astyn syzyp aıtpaı ketýge bolmaıdy. Aýyl sharýashylyǵynyń alapat qýatqa ıe bolýy Elbasymyzdyń arqasy! Máńgilik eldiń muratyn záýlim kókke kótergen, kózdegenine jetkizgen Nursultan Ábishuly Nazarbaevqa myń alǵys. Ol alǵysty jalǵyz men ǵana emes, ózi súıetin eli, ózi súıetin jeri jan tebirentip aıtyp jatyr.
Qulan BOLATOV,
«Qulan» sharýa qojalyǵynyń jetekshisi
Zerendi aýdany, Aqmola oblysy
