Almaǵaıyp kezeńde táýelsiz Qazaqstannyń negizin qalap, álemdik keńistikte ózindik ornyn aıshyqtap bergen Nursultan Nazarbaevtyń eńbegi qanshalyqty zor ekeni barshaǵa belgili. Meniń jáne zamandastarymnyń baqytty balalyq shaǵy, qamsyz jastyǵy Nursultan Ábishulynyń prezıdenttik kezeńimen tuspa-tus keldi. Bul – zor maqtanysh ári mereı.
Men munaıly aımaq Atyraýda týyp-óstim. Bala kúnimnen munaıshy bolýdy armandadym. Mektep bitirgennen keıin qalaǵan mamandyǵym boıynsha bilim alyp, eńbekke aralastym. Qazir otandyq «Embimunaıgaz» mekemesinde jumys isteımin. Elbasy jyl saıynǵy Joldaýlarynda, memlekettik baǵdarlamalarda energetıka salasyn damytýdyń basym baǵyttaryn atap kórsetedi. Atyraýǵa kelgen saparynda bizdiń kásiporynǵa arnaıy kelip, jumys barysymen tanysqan bolatyn. Osynyń ózi men sekildi jas munaıshylardyń erteńge degen senimin nyqtap, jarqyn bolashaǵyna kepildik berdi.
Búgingi Atyraý – azattyq tańymen araılanǵan, Elbasynyń sarabdal saıasatymen jarqyn bolashaqqa nyq qadam basqan aımaq. Munaıly ólkeniń ósip-órkendeýinde Memleket basshysynyń orasan zor eńbegi bar. Nursultan Ábishulynyń uıytqy bolýymen Qashaǵanda munaı óndirý jumystary bastaldy. Qarashyǵanaqqa qatysty másele sheshimin tapty. Teńiz ken ornynyń aıasy keńidi. Otandyq kásiporyndar munaı-gaz salasynda buryn-sońdy bolmaǵan tabystarǵa qol jetkizdi.
Árıne Nursultan Ábishulynyń málimdemesin men de alańdaýly kóńilmen qabyldadym. Osynsha ýaqyt ishinde bar ǵumyryn, densaýlyǵyn, ýaqytyn qazaq eliniń damýyna qosqan kemeńger basshynyń bul qadamy da jaqsylyqtyń bastaýy bolsyn degen tilektemin.
Bıylǵy jyldy Jastar jyly dep belgilep, jańa áleýmettik saıasattyń irgetasyn qalap, halyqqa shyn mánindegi janashyr ekenin uqtyrǵany úshin razymyz.
Bizdiń jarqyn jastyǵymyz úshin, beıbit aspanymyz ben berekeli birligimiz úshin myń alǵys Sizge, Tuńǵysh Prezıdent!
Artýr DINǴALIEV,
«Jaıyqmunaıgaz» munaı-gaz óndirý basqarmasynyń geology
ATYRAÝ
