«Astana Opera» teatrynyń ujymy «BraVo» syılyǵyn berý týraly jańalyqty erekshe qýanyshpen qabyl aldy. Sarapshylar men halyqaralyq mýzykalyq qoǵamnyń qurmetine ıe bolý biz úshin úlken mártebe. Bedeldi marapat «Astana Opera» ujymyn jańa jetistikterge shabyttandyra túsedi dep senemin, ártisterimizdiń qajyrly eńbegine kórermender biraýyzdan «jaraısyńdar!» dep baǵa beredi degen úmittemiz. Taǵy da barlyqtaryńyzǵa úlken raqmet. Barshańyzǵa beıbitshilik, kelisim men shyǵarmashylyq tabystar tileımiz, - dep atap ótti Qazaqstannyń eńbek sińirgen qaıratkeri, «Astana Opera» MOBT dırektory Ǵalym Ahmedıarov.
Osy keshte Úlken teatr sahnasynan qazaqstandyq opera juldyzy, «Bolshaıa opera» reseılik jobasynyń jeńimpazy Saltanat Ahmetovanyń ásem daýysy syńǵyrlap, ol Sh.Gýnonyń «Romeo men Djýletta» operasynan Djýlettanyń valsin oryndady. Sonymen qatar ákki kórermenniń aldynda kórnekti opera oryndaýshylary, ataqty juldyzdar óner kórsetti: Vıttorıo Grıgolo (Vittorio Grigolo), Andjela Georgıý (Angela Gheorghiu), Alessandro Safına (Alessandro Safina) jáne t.b. Saltanatty keshti dırıjer Pavel Klınıchevtiń jetekshiligindegi Úlken teatrdyń hory men orkestri súıemeldedi. Esimderi álemge áıgili gollıvýd akteri Djon Travolta (John Travolta) men aǵylshyn aktrısasy Helen Mırren (Helen Mirren) «BraVo» syılyǵyn tabystaý rásiminiń arnaıy qonaqtary boldy.
Eske salar bolsaq, «BraVo» syılyǵynyń ózge mýzykalyq júldelerden ózgeshiligi – Eýrazııa qurlyǵynyń ondaǵan elin qamtıtyn teńdessiz aýqymdylyǵy.
