QHR Memlekettik Keńesi Premeriniń orynbasary Han Chjenmen kezdesý barysynda Álıhan Smaıylov ekijaqty ózara is-qımyldyń ózekti máselelerin talqylady.
Taraptar «Nurly jol» JES-nyń jáne «Jibek joly ekonomıkalyq beldeýi» qurylysy bastamalaryn sáıkestendirý ınfraqurylymdy, ınvestısııalar men saýdany, ónerkásipti, kólikti, mádenı-gýmanıtarlyq almasýdy damytýda QR–QHR bar áleýetin iske qosýǵa múmkindik bergenin rızashylyqpen atap ótti.
Álıhan Smaıylov pen Han Chjen eksportqa baǵyttalǵan ónimdi shyǵarý boıynsha birlesken óndiristi ashý jóninde yntymaqtastyqty odan ári júrgizý múmkindigi týraly ortaq pikirge keldi. Joǵary óńdelgen deńgeıdegi jobalardy tabysty iske asyrý úshin Qazaqstan–Qytaı óndiris qýattarynyń yntamaqtastyǵy qorynyń áleýetin iske qosý týraly ýaǵdalasty.
Taraptar QHR qarjy ınstıtýttarynyń «Astana» halyqaralyq qarjy ortalyǵymen strategııalyq yntymaqtastyǵyn ornatý múmkindigin talqylady, sondaı-aq taraptardyń ózara tabysty is-qımylǵa múddeliligine erekshe nazar aýdaryldy. Naqty sandarmen dáleldengen QR men QHR arasyndaǵy kólik-logıstıkalyq yntymaqtastyqty damytýdyń joǵary qarqynyn atap ótti. Máselen, qazaqstandyq shekaradaǵy («Dostyq – Alashankoý» jáne «Altynkól – Qorǵas») temirjol ótkelderi «Qytaı — EO — Qytaı» baǵyty boıynsha konteınerlik temirjol tasymaldarynyń 56%-yn qamtamasyz etedi. «Qorǵas – Shyǵys qaqpasy» arnaıy ekonomıkalyq aımaǵy, «Qorǵas» halyqaralyq shekara mańy yntymaqtastyǵy ortalyǵy jobalary sátti iske asyrylýda.
QR–QHR yntymaqtastyǵy jónindegi komıtettiń tóraǵalary bola otyryp, Álıhan Smaıylov pen Han Chjen eki tarap úshin ózara tıimdi jobalardyń praktıkalyq iske asyrylýyn erekshe baqylaýǵa alýǵa ýaǵdalasty.
Sondaı-aq, QR Premer-Mınıstriniń Birinshi orynbasary – QR qarjy mınıstri Álıhan Smaıylov QHR Bas keden basqarmasynyń basshysy Nı Iýefenmen kezdesip, ekijaqty yntymaqtastyqtyń ózekti máseleleri jáne QR men QHR keden qyzmetteri arasyndaǵy iske asyrylyp jatqan jobalardy talqylady.
Búgingi tańda basty mindetteriniń biri — birqatar jyldar boıy oryn alyp kele jatqan QR men QHR arasyndaǵy keden statıstıkasy málimetteriniń sáıkes kelmeýi deńgeıin tómendetý. Osy mindetti sheshý turǵysynda taraptar QR Qarjy mınıstrligi men QHR Bas keden basqarmasy arasyndaǵy Syrtqy saýda keden statıstıkasy salasynda ádistemelik jáne aqparattyq ózara is-qımyl týraly hattamaǵa almasatyn aqparat quramyn keńeıtý bóliginde ózgerister engizý qajettigi týraly ortaq pikirge keldi. Sondaı-aq Taraptar QHR eksporttyq deklarasııasynan aqparatty alý qajettiligimen kelisip, osy baǵyttaǵy ózara is-qımyldy kúsheıtýge ýaǵdalasty. Tájirıbe retinde basqa ótkizý pýnktterine taratý arqyly onlaın tártibindegi eksporttyq deklarasııany berý iske asyrylatyn bolady, bul bıýdjetke kedendik tólemder men salyq alymynyń tolyqtyǵyn qamtamasyz etýge múmkindik beredi jáne málimetterdiń sáıkes kelmeýin tómendetýge yqpal etedi.
2018 jyldyń qorytyndylary boıynsha QHR-da QR-nyń aýyl sharýashylyǵy ónimi ımportynyń ósýin atap kórsete otyryp, aýyl sharýashylyǵy salasyndaǵy yntymaqtastyq nátıjelerine qanaǵattandyrýshylyq bildirdi jáne osy baǵytta jumys isteýge daıyndyǵyn rastady.
Sondaı-aq, Álıhan Smaıylov QHR Qarjy mınıstri Lıý Kýnmen kezdesti.
Kezdesý barysynda taraptar eldiń aǵymdaǵy ekonomıkalyq jaǵdaıyn talqylap, «Bir jol – bir beldeý» bastamasy men «Nurly jol» baǵdarlamasy aıasyndaǵy ózara is-qımyl, jobalyq jáne taýarlyq qarjylandyrý salasynda qarjy ınstıtýttary arasyndaǵy yntymaqtastyqty odan ári nyǵaıtý múmkindikteri týraly pikir almasty. Taraptardyń basty nazarynda makroretteý, salyq reformalaryn júrgizý, bıýdjettik basqarý, qarjy yntymaqtastyǵy salasyndaǵy ózara is-qımyl máseleleri boldy.
Taraptar Qytaımen syrtqy saýda qatynastarynyń serpini kóbine Qazaqstan aýmaǵyndaǵy birlesken jobalardy iske asyrýmen anyqtalatyndyǵyna kóńil aýdardy. 2018 jyldyń qorytyndylary boıynsha Qytaı QR-nyń iri ınvestorlarynyń qatarynda 4-oryndy ıelenip otyr. QHR-nyń QR-ǵa ınvestısııalarynyń negizgi salalary: kólik jáne qoımalaý (ınvestısııalardyń jalpy kólemindegi úlesi – 35,4%), taý-ken óndirý ónerkásibi jáne karerlerdi jasaý (16,8%), óńdeýshi ónerkásip (13,1%), qurylys (12%), qarjy jáne saqtandyrý qyzmeti (14%).
Budan ózge, taraptar birlesip iske asyrylyp jatqan jobalar boıynsha pikir almasyp, jobanyń árqaısysy boıynsha ońtaıly sheshimderdi qabyldaý qajettigi týraly ortaq pikirge keldi. QR–QHR yntymaqtastyǵy jónindegi komıtet aıasynda kópjaqty strategııalyq áriptestikti nyǵaıtý úshin sharalar qabyldaý týraly kelisti.
