«Mıllıondaǵan adam uqsaýǵa tyrysqan Ult Kóshbasshysy ýaqytynan buryn ókilettigin toqtatyp, Prezıdenttik laýazymyn tapsyrdy. Tuńǵysh Prezıdent Nursultan Nazarbaevtyń Qazaqstan úshin jasaǵan ıgi isterine el dán rıza. Táýelsiz jas memlekettiń eń órshil jobalary iske asty. Halyqqa jasaǵan qyzmet Elbasynyń erik-jigeri, shynaıy otansúıgishtigi, danalyǵy, kemeldigi týraly el aýzynda áli aıtyla beredi. Tuńǵysh Prezıdent — eldegi tynyshtyq pen tatýlyqtyń turaqty kepili bola bildi. Qıyn jaǵdaılarda batyl sheshim qabyldady. Olar ózin-ózi aqtap, elimizdiń órkendeýine serpin berdi. Nursultan Nazarbaev óziniń barlyq kúsh-qýaty men múmkindigin paıdala otyryp, alǵa qoıǵan barlyq maqsatty josparlardy iske asyrdy. Ata-babalarymyzdan mura bolǵan beıbitshilik pen kelisimdi saqtaı bildi. Nur-aǵamyz tarıhta qalatyn tulǵa. Biz áli sizben birgemiz, qadirli Elbasy!» - dedi qoǵam qaıratkeri Dosybaı Sherimqulov.
«Halyqtyń birligi men berekesi, ulttardyń tatýlyǵy, eldiń tynyshtyǵy - bári de Elbasynyń júrgizgen sarabdal saıasatynyń jemisi. Qazaqstan memleketiniń táýelsizdigi jolynda talaı qıyndyqtardy bastan ótkerse de, eldiń ekonomıkasy men áleýetin kóterýde Elbasy barlyq kúsh-qaıratyn jumsady. Búginde álemdik deńgeıde aýyz toltyryp aıtarlyqtaı jetistikterge jettik. Álemde bolyp jatqan daǵdarysqa moıymaǵan Qazaqstan bıik belesterdi baǵyndyryp, eńseli elge aınaldy. Kúni keshe oblysta bolǵan mańyzdy oqıǵalardyń biri – oblys ortalyǵyn kıeli Túrkistanǵa aýystyrýy men Shymkent qalasyn úshinshi megopolıst qalalardyń qataryna engizýi týraly Jarlyqtary edi. Jerimizdiń keńdigi ǵana emes, halyqtyń sany jaǵynan da maqtanatyn jaǵdaıǵa jettik», - dedi aqyn Hanbıbi Esenqaraqyzy.
«Keshegi KSRO taraǵannan keıin bos keńistikte qalǵan Qazaqstandy ekonomıkalyq jaǵynan turalaǵan kúıinde qabyldap alǵan N.Nazarbaev óz elin álemdik deńgeıge jetkizý jolynda janqııarlyqpen qalaı kúreskeni kóz aldymyzda. Iá, oǵan ońaı bolǵan joq. El damýy múldem basqa arnaǵa buryldy. Naryqtyq qatynas kezinde adamdar qalaı ómir súrýdiń joldaryn bilgen joq. Degenmen, damýdyń dańǵyl joly bireý-aq edi. Mine, sony Nurekeń asqan kóregendikpen tanı bildi. Árıne, ýaqyt talabyna, zamana talabyna barlyǵymyz bas ıemiz. Onyń óte joǵary laýazymynan óz erkimen bas tartýy da onyń óte aqyldy ári suńǵyla saıasatker ekenin kórsetedi. Kóńilge úlken demeý bolatyny - Ult Kóshbasshysy áli de atynan túsken joq. Ol qasymyzda, Táýelsiz elin tuǵyrly etý jolynda burynǵysynan da jigerli eńbek ete bermek», - dedi qoǵam qaıratkeri Orynbaı Rahmanberdıev.
