Jınalǵan qaýym merekelik konsert tamashalap, toǵyzqumalaq pen asyq atý oıyndarynda sheberlik baıqasty, ulttyq taǵamdardan dám tatyp, kıimder kórmesin tamashalady.
Konserttik baǵdarlama Astana qalasynyń Mádenıet jáne sport basqarmasymen uıymdastyryldy. Klara Tólenbaeva, Dos, «Art-Dombyra» jáne «Alaman» trıolary, «Saryarqa» jáne «Dıart» toptary, «Inkárim» bı ansambli, «Shabyt» halyqaralyq shyǵarmashyl jastar festıvaliniń Gran-prı ıegeri Jaqsykeldi Maıasarov jáne basqa da qazaqstandyq estrada juldyzdary kelýshilerge kóterińki kóńil-kúı syılady.
Sonymen qatar, Promyshlennyı turǵyn alabynyń «Zamandastar» ardagerler horynyń solısteri merekege arnaıy daıyndaǵan shyǵarmalaryn oryndady. Budan basqa, anımatorlar men boıshań qýyrshaqtardyń qatysýymen balalarǵa arnalǵan ınteraktıvti oıyn-saýyq uıymdastyryldy, toǵyzqumalaq pen asyq atý jarystarynyń jeńimpazdary estelik syılyqtarmen marapattaldy.
Promyshlennyı turǵyn alabynyń qurmetti turǵyny, «Zamandastar» ardagerler horynyń bas solısi Jeńis Beısembaev qala turǵyndaryn kóktemgi merekemen quttyqtady: «Qurmetti astanalyqtar, Promyshlennyı turǵyn alabynyń turǵyndary! Sizderdi Naýryz merekesimen quttyqtaımyn! Barshańyzǵa baq-bereke, molshylyq, baqyt pen bar jaqsylyqty tileımin. Qazaqstan, alǵa!».
Eske salaıyq, turǵyn alaptarynda Naýryz meıramyna oraılastyrylǵan halyqtyq serýender jalǵasyn tabady. 21 naýryzda saǵat 11:00-de Prıgorodnyı jáne Úrker, al 22 naýryzda saǵat 11:00-de Kazgorodok, О́ndiris, Kóktal-1 jáne Kóktal-2 kentterinde Ulystyń uly kúnine arnalǵan merekelik sharalar ótedi. Al Internasıonalnyı jáne Mıchýrıno turǵyn alaptarynyńturǵyndary merekelik konsertti 18 naýryzda tamashalaǵan bolatyn.
