Bul pikirtalas alańy tek kásibı jýrnalısterge ǵana emes, túrli qoǵamdyq uıymdar ókilderine de oıyn bólisýge múmkindik berdi.
«Memleket buqaralyq aqparat quraldaryn qansha baqylaıyn degenmen búgingi ınternet pen áleýmettik jeliler yqpaly oǵan tolyq múmkindik bere bermeıdi. Sondyqtan ne isteý kerek? Búgin bizde tuńǵysh ret oblystyq jáne Reeıdiń kórshi oblystarynan buqaralyq aqparat quraldarynyń ókilderi, belgili blogerler, jýrnalıster uıymdarynyń basshylary jınalyp, osy suraqqa taǵy da jaýap izdep, pikir almasady. Bul óte mańyzdy, bizdiń ulttyq qaýipsizdigimiz ǵana emes, eki eldiń yntymaqty qarym-qatynasy da aqparattyń qalaı berilýine táýeldi ekenin umytpaıyq» dedi medıa-forýmdy uıymdastyrǵan «Qostanaı-medıa-Holdıng» jaýapkershiligi shekteýli seriktestigi dırektorlar keńesiniń tóraǵasy Mahabbat Jýtaev.
Forýmnyń plenarlyq májilisinde Kommýnıstik halyq partııasynyń hatshysy Dmıtrıı Legkıı, О́.Sultanǵazın atyndaǵy Qostanaı memlekettik pedagogıka ýnıversıtetiniń rektory, professor Erkin Ábil, oblystyq jýrnalıster uıymynyń tóraǵasy Sergeı Harchenko, «Sodrýjestvo» baspasóz klýby Ortalyq Azııa baǵytynyń redaktory Janna Tólendınova, Chelıabi oblystyq jýrnalıster odaǵynyń tóraǵasy Denıs Mıakıshev, Qorǵan oblystyq jýrnalıster odaǵy tóraǵasynyń orynbasary Svetlana Emelıanova, «Ádil sóz» qorynyń zańgerlik qyzmetiniń jetekshisi Tamara Sımahına, Qazaqstan jýrnalıster odaǵynyń tóraǵasy Seıitǵazy Mataev, taǵy basqalar búgingi kásibı jýrnalıstıka men áleýmettik jelilerdiń jumysy, yqpaly týraly pikirlerin ortaǵa saldy.
«Áleýmettik jeliler men blogerlerdiń dástúrli buqaralyq aqparat quraldardan aıyrmashylyǵy, olardyń óziniń sózin tikeleı baǵyttaıtyn aýdıtorııasy bolady, olar dástúrli BAQ-tan góri blogerge senedi. Eń qyzyǵy, blogerdiń aýzyna qaraıtyn aýdıtorııa olardyń aqparat berýdegi jaýapkershiliginiń, biliminiń deńgeıine qaramaı, olarǵa kásibı jýrnalısten joǵary senedi. Endi sońǵy 3-4 jylda adamdardyń aqparat almasýyndaǵy messendjerler trendi áleýmettik jeliniń ózin yǵystyryp bara jatqandaı. Tehnologııanyń jyldam damýy adamdardyń aqparat almasýy úshin kompıýterdi, televıdenıeni, basqany da kerek etpeı otyr, olarǵa uıaly telefon bolsa jetip jatyr. 2016 jyly messendjerlerdiń paıdalanýy áleýmettik jelige jetip qalǵany týraly aqparat oqyǵan edim, al búgin olar áleýmettik jeliden asyp túsedi. Eger qazir «Feısbýkti» orta jastaǵy belsendi býyn paıdalansa, «Ýatsapty» besiktegi baladan beli búgilgen shalǵa deıin paıdalanady. Áleýmettik jelilerde bloger kásibı bolmasa da, onyń aıtqan pikirleriniń avtory belgili bolady, jurt ýaqytysynda pikir bildiredi. Al «Ýatsappen» taraǵan aqparat vırýspen birdeı, eger aqparat qate bolsa, onyń qaıdan shyqqanyn, avtory kim ekenin bilý múmkin emes» degen Erkin Ábil messendjerler arqyly taraǵan bilim júıesine qatysty jalǵan aqparattardan mysaldar da keltirdi.
Forýmnyń plenarlyq májilisiniń ózinde qyzý pikirtalastar boldy. Tústen keıin medıa-forýmǵa qatysýshylar «Saıası tehnologııa: BAQ jáne partııalar», «Zańnama jáne BAQ, daý-damaılar», «Áleýmettik jeliler jáne blogerlik trendteri» degen taqyryptaǵy úsh seksııaǵa bólinip, jumys istedi.
Forým qonaqtary Qostanaı qalasynda ótetin Naýryz merekesiniń qyzyǵyn tamashalaıdy.
Názıra Járimbet,
«Egemen Qazaqstan»,
Qostanaı
