Zýhra Boranbaevanyń jetinshi balaǵa aıaǵy aýyr eken. Aıy-kúni taıap otyrǵan ana, jańa baspanasymen quttyqtap kelgen bizben aqjarma tilegin bylaı bólisti: «Aýylda týyp óstim. Turmysqa shyqqan soń ata-anamyzdan bólek shyǵaıyq dep páter jaldadyq. Men Qudaıdyń bergen balalaryn baǵyp úıde otyrdym. «Áne úı alarmyz, mine úı alarmyz» dep talpynsaq ta, úıelmeli súıelmeli úsh bala jedeqabyl keldi. Otaǵasy Amanǵajy jalǵyz bas kóterer, onyń tabysy kıim-keshek, tamaqtan aspady. Sóıtip alty balaly ana atandyq. Aýylda turǵyn úı salynbaǵandyqtan úı kezegi de jetpedi. Bıyl da aıaǵym aýyrlady. Juma kúni shelpek pisirip, as qamdap otyr edim, úıge buryn Kókpekti aýylynda ákim bolǵan Rýslan Bektasov aǵaı kelip: «Sizdi «Elim-aı – Kókpekti» basshysy keńsege kelsin dep jatyr» dedi. Kıinip barsaq, Bolat Bekberdınov aǵa: «Men sizderge úı alyp berdim. Mynaý kilti, merekeńizben quttyqtaımyn» – dedi. Tóbem kókke jetti. Meniń olarǵa degen alǵysym – aman-esen bosanyp, osy balalarymdy naǵyz azamat etip tárbıeleýden bastalar. Qyzdarymdy apaıdaı, uldarymdy aǵaıdaı etip tárbıelep, el qataryna qosqym keledi. Basqa kóp sózdi aıtyp, kýanyshymdy jetkizý múmkin emes».
Tórt bólmeli úıin tap-taza etip jınap qoıypty. Uldarda – Ádil, Ulan, Álınur úshin bólek bólme, qyzdardyki – Gúlim, Tolǵanaı, Toǵjanǵa da jyly, jaryq jaı bar eken. Qonaq bólmesi men asúıi at shaptyrym. Jyly, jaryq, terezege gúl ekken ana men balanyń qýanyshynda shek joq. Syrtqy jaı bólek sharýashylyq – monsha, garaj, jazǵy as úı, mal qora, otyn shoshalasy saqadaı saı, qatyp tur. «Qaıtsem otbasymdy asyraımyn, balalarymdy jetkizemin, jarymdy baqytty etem» degen Amanǵajynyń jigerine jiger, qaıratyna qaırat qosyldy. Balaly úıin bazar etken aǵalaryna dán rıza. Qaıyrymdy jigitterdiń qamqorlyǵynyń qaıtarymyn qyzyn ardaı aıalap, ulyn asyl azamat etip ósirip qazaqtyń sanyn kóbeıtýmen qaıtarmaq. Qýanyshqa ortaq bolǵanymyzǵa biz de shattandyq. Dál osyndaı qaıyrymdy halqyna, jylýy jurtyna jetetin qazaq azamattary qasıetti jerimizdi kórkeıtetine kámil sendik.
Aıta keteıik, Kókpekti aýdanynda aýdan kásipkerleriniń bastamasymen aqpan aıynan bastap búgingi kúnge deıin 193 kópbalaly jáne jaǵdaıy tómen otbasyǵa 8 mıllıon teńgeden astam qarajatqa materıaldyq kómek kórsetildi.
Qaırat BESBAIYS,
«Egemen Qazaqstan»
Shyǵys Qazaqstan oblysy,
Kókpekti aýdany
