«Memleket basshysy sársenbi kúni, otyz jyldan keıin, otstavkaǵa ketý týraly málimdeme jasady. Kommýnıstik partııa qatarynda bolǵan burynǵy kóshbasshy qıraǵan Keńes Odaǵynan shyǵyp, jańa el qurdy. Qazir etnıkalyq ártekti ulttardyń yntymaǵyn jarastyrǵannan keıin, joǵary bilimdi elıtasy bar, gúldengen, munaıǵa baı ekonomıkalyq aımaqty baqylap otyr. Qazaqstan Reseı jáne Qytaımen jaqsy qarym-qatynas ustady. AQSh-tyń odaqtasy retinde tanylyp, geosaıası turaqtylyqtyń tiregine aınaldy» delingen Financial Times gazetinde jarııalanǵan maqalada.
Sondaı-aq Máskeýdegi Karnegı ortalyǵynyń aǵa ǵylymı qyzmetkeri Aleksandr Gabýev «Bul qadam Nazarbaevtyń óńirdegi eń kóregen jáne eń tájirıbeli kóshbasshy ekenin, onyń boljamdary áli de durys jol silteıtinin kórsetedi» dep esepteıdi.
«Ortalyq Azııada ornalasqan elde gúldený men turaqtylyqty qoldaý, eldiń orasan zor munaı-gaz baılyǵyn barynsha arttyrý jáne sheteldik ınvestorlardy tartýǵa arnalǵan aýqymdy jańǵyrtý jobasyn iske qosý – onyń eńbegi» deıdi Financial Times.
Al Reseı Ǵylym akademııasynyń taldaýshysy Stanıslav Prıtchın «Nazarbaev bıliktegi sabaqtastyqty qamtamasyz etedi» deıdi.
«Jańa memleket basshysy men Qaýipsizdik Keńesiniń basshysy Nazarbaev arasynda qandaı da bir qaqtyǵys týyndaıtynyn elestetý qıyn. Bul eldiń jańa basshysynyń saıası biligin arttyryp, el kóshbasshysy retinde tájirıbe jınaqtaýǵa múmkindik beredi», dedi Prıtchın.
