Ol óziniń Prezıdenttik ókilettiligin toqtatý týraly sheshim qabyldaǵanyn jarııalady. Nursultan Ábishuly, sonymen qatar osy jyldar ishinde elimizdiń damýy, onyń álemdik arenaǵa tanylýy úshin qolynan kelgeniniń bárin jasaǵanyn, sonyń nátıjesinde memeleketimiz álemdik qaýymdastyqqa tanylyp, ekonomıkalyq, áleýmettik-saıası, quqyqtyq turǵydan belgili damý deńgeıine jetkendigin de málimdedi. Sondaı-aq bilim berý, sport, mádenıet salalarynda aıtarlyqtaı jetistikke jetkeni elimizdiń egemendiginiń, táýelsizdiginiń jemisi ekenin, endeshe bolashaqta da táýelsizdik týyn bıik ustaý qajettigin eskertti. Ol óziniń Qazaqstan halqyn, qazaq ultyn shyn nıetpen qurmetteıtinin, zor súıispenshilikpen qaraıtynyn aıta kelip, barsha qazaqstandyqtarǵa alǵysyn bildirdi.
Búginde Nursultan Nazarbaev týraly el ishinde, halyqaralyq deńgeıde ártúrli pikirler bildirilýde. Alaıda bir nárse anyq, ol tek respýblıkamyzǵa, irgeles jatqan memleketterge ǵana belgili emes, álemge tanymal tulǵa. Elimizdi basqarǵan 30 jyldaı ýaqyt ishinde bizdiń aıtarlyqtaı jetistikterimiz Memleket basshysy retinde N.Nazarbaevtyń esimimen tikeleı baılanysty. О́ıtkeni prezıdenttik basqarýdaǵy respýblıka bolǵandyqtan barlyq ekonomıkalyq, saıası-áleýmettik mándi ister Prezıdenttiń sheshimimen, uıǵarymymen júzege asyrylady. Prezıdent memleketimizdiń barlyq salalar boıynsha eń basty jetekshi jáne jaýapty tulǵasy. Sol sebepti de qalyń jurtshylyq elimizdegi ıgi isterdi de, keleńsizdikterdi de onyń esimimen baılanystyryp qaraıdy, bul qısynsyz da emes. Elimiz barlyq saladaǵy jetistikterine turaqtylyqtyń, tutastyqtyń, aýyzbirshiliktiń, biregeıliktiń, birliktiń nátıjesinde qol jetkizdi. Bul turǵydan alǵanda Nursultan Nazarbaevtyń eńbegi asa zor ekenin joqqa shyǵarýǵa bolmaıdy.
N.Nazarbaev Qazaqstan halqyna, zııaly qaýymyna syılastyqpen, úlken senimmen qaraıtyndyǵyna, bolashaqta Prezıdenttik úlken laýazymǵa keletin adamnyń jetistikterimizdi ári qaraı jalǵastyrýǵa qyzmet etetinine senim bildirdi. Bıylǵy jyldy Jastar jyly dep jarııalaǵan ol bolashaq jastardiki ekenine, aldaǵy ýaqytta bılik basyna, áleýmettik-ekonomıkalyq salalardyń tutqasyn ustaýǵa sol jastardyń keletinin eskere otyryp, olarǵa zor tabystar tiledi. О́ziniń aldaǵy ýaqytta da halyqpen birge bolatynyn, Qaýipsizdik Keńesiniń jáne «Nur Otan» partııasynyń Tóraǵasy retinde memleketimizdiń saıası ómirinen tys qalmaıtynyn málimdedi. Oıymyzdy qoryta aıtsaq, Nursultan Nazarbaev bıligi tusynda elimizdiń jetken jetistigin eshkim joqqa shyǵara almasy anyq. Sondaı-aq onyń osy jyldar ishinde álemge tanymal tulǵa bolǵany jáne Qazaqstannyń jańa tarıhynda ózindik orny bar ekeni talqyǵa túspeıtini aqıqat.
Altaı TAIJANOV,
fılosofııa ǵylymdarynyń doktory, professor, Marat Ospanov atyndaǵy Batys Qazaqstan Medısına ýnıversıtetiniń «Qoǵamdyq-gýmanıtarlyq pánder» kafedrasynyń meńgerýshisi
