«Nur-Sultan, Almaty jáne Shymkent qalalarynda jyl saıyn jas mamandarǵa arnalǵan myńǵa jýyq arendalyq turǵyn úı turǵyzý josparda bar. Ol baspanalar kásiporyndarda, aýyl sharýashylyǵy men bıýdjettik mekemelerde, ǵylym salasynda jumys isteıtin jas mamandarǵa, isin endi bastaǵan kásipkerlerge arnalyp salynady. Bul rette otbasyndaǵy bala sany, múmkindigi shekteýli, arnaıy kútimdi qajet etetin bala tárbıelep otyrǵandar, tolyq emes otbasylar jáne taǵy basqa faktorlar eskeriledi» dedi mınıstr.
Budan soń, ol jastardy eńbekpen qamtý kerek ekenin aıtty.
«Ekinshi baǵyt boıynsha «Jas kásipker» baǵdarlamasyn júzege asyrý qarastyrylǵan. Úsh jyldyń ishinde 60 myń jas azamat kásipkerlik negizderi boıynsha oqytylady. Aýyldaǵy jastarymyzǵa arnaıy 15 myń mıkrokredıt berý josparlanǵan. Al jańa bıznes-ıdeıalardy júzege asyrý úshin 30 myńnan asa memlekettik granttar bólinbekshi» dedi Aqparat jáne qoǵamdyq damý mınıstri.
Sondaı-aq ol bilim berý men volonterlar uıymdaryn damytý jospary bar ekenin atap ótti.
«Qazir «Jas maman» dep atalatyn baǵdarlama ázirlenip jatyr. Osy baǵdarlama arqyly suranysqa ıe 100 ındýstrıaldy jáne servıstik kásipter boıynsha mamandar daıyndalady. Bul baǵyttaǵy jumystar elimizdegi 20 aldyńǵy qatarly Joǵary Oqý Oryndary men 180 kolledjdiń bazasynda júzege asady. Úsh jyldyń ishinde elimizdiń barlyq aımaqtarynda 200 myń jas azamatty oqytyp shyǵarýdy kózdep otyrmyz» dedi ol.
Mınıstrliktiń aqparatyna súıensek, «Ashyq ýnıversıtet» jobasyna barlyq joǵary oqý oryndar men kolledjderdi qosý josparlanǵan.
«Irgeli ári qoldanbaly zertteýlerge qatysty granttyq qarjylandyrýdy jylyna 3 mıllıard teńgege ulǵaıtý. Volonterlyq sharalarǵa belsendi qatysyp júrgen stýdentterdiń stependııasyn 30%-ke kóbeıtý» dedi D.Abaev.
