«О́tken jyldyń qorytyndysy boıynsha ónerkásiptiń ósý qarqyny joǵary bolyp, 4,1%-dy qurady. 1,1 trln teńge ınvestısııa tartyldy. 13 myńnan astam jańa jumys orny ashyldy», — degen Asqar Mamın birqatar máselege kóńil aýdarý qajettigin aıtty.
Birinshi. Mashına jasaý ındýstrııalandyrý draıverleriniń biri bolýy tıis.
«Kólik ónerkásibi men aýyl sharýashylyǵy mashınalaryn jasaýǵa basa nazar aýdarý qajet, munda óndiristik kooperasııanyń arqasynda eleýli ósim kútiledi», — dep tapsyrdy A. Mamın.
Munaı-gaz mashınasyn jasaý salasy ekonomıkanyń ósýine jańadan serpin bere alatyn salalardyń biri ekeni atalyp ótti. Osy rette, Premer-Mınıstrdiń aıtýynsha, Teńiz, Qashaǵan jáne Qarashyǵanaq ken oryndaryndaǵy iri munaı-gaz jobalarynyń ulǵaıýynyń eskerip, bul sektordyń odan ári ósýine úlken áleýeti bar ekenin atap ótken jón.
«Munaı-gaz mashınasyn jasaý salasy Úshinshi ındýstrııalyq-ınnovasııalyq damý baǵdarlamasynyń basym baǵyttarynyń birine aınalýy qajet», — dedi Premer-Mınıstr.
Ekinshi. Metallýrgııa ónerkásibinde, ásirese qara metallýrgııa segmentinde 4,7% deńgeıinde turaqty ósimdi qamtamasyz etý qajet. A. Mamın Arselor Mıttal Temirtaýdyń ósý qarqynynyń oń bolǵany mańyzdy ekenin atap ótti.
Úshinshi. Asqar Mamın shıkizattyq emes eksport máselelerine erekshe kóńil bólýdi tapsyrdy. Bul baǵytty qoldaý úshin 500 mlrd teńge mólsherinde qarajat kózdelgen.
«Osynyń arqasynda kásiporyndardyń eksporttyq áleýetin joǵarylatyp qana qoımaı, jalpy ekonomıkalyq ósimge qomaqty úles qosylady», — dedi Premer-Mınıstr.
Tórtinshi. «Qarapaıym zattar ekonomıkasyn» damytý qajet. Bul maqsatqa QR Prezıdentiniń tapsyrmasymen 600 mlrd teńge mólsherinde qarajat qarastyrylǵan.
«О́ńdeýshi ónerkásiptiń basym sektorlaryn jáne jobalaryn anyqtadyq. Sondyqtan da naqty nátıjelerge jetý kerek. Bul ımportty almastyrýǵa, halyqty ónimdi jumyspen qamtýǵa qosymsha serpin beredi. Osy baǵyttardy damytý maqsatynda qarqyndy jumys uıymdastyrylady», — degen Premer-Mınıstr jańa ındýstrııalandyrý – qazirgi zaman mindetterine saı kelýi kerek ekenin aıtty.
