Alaıda 22 jastaǵy Anastaııa Trýbnıkova kásipker bolsa da, pedagogıkany tastaǵan joq. Endi onyń aldyndaǵy partada oqýshylar emes, 2 jastan asqan búldirshinder otyrady. Osydan eki aı buryn ǵana Qostanaı aýdanynyń ortalyǵy Zatobol kentinde balalar ortalyǵyn ashqan jas qyz óziniń áý basta oılap júrgen bastamasyn júzege asyra bildi. Ol balalardy shyǵarmashylyq kómegimen oqytýdy bastady.
Anastasııa óziniń bıznesine tııanaqty daıyndyqpen keldi. Ol aldymen muǵalimdikten oqýshyǵa aınalyp, ıaǵnı «Bastaý» jobasyna qatysyp, basqalarmen birge partaǵa otyrdy.
«Men balalardy jaqsy kóremin, óz mamandyǵym unaıdy. Biraq balalarǵa qajetti bilim berýdi bilsem de, kásipkerlik týraly habarym joq edi. «Bastaý» kýrsy maǵan býhgalterlikti, marketıng men kásipkerliktiń basqa da kiltıpandaryn úıretti» deıdi Anastasııa. Ol balalar ortalyǵyn taqyr jerden bastady. Ol úshin 4 mıllıon teńge nesıe aldy. Bul qarjy ortalyqqa mebel, jabdyqtar alýǵa jáne taǵy eki pedagogke jalaqy tóleýge jetti.
«Biz jarnamadan qarjymyzdy únemdedik, kóshege shyǵyp, paraqshalar tarattyq. Balalar taqyrybyna keshter ótkizdik. Búginde on bes bala jınaldy, olarmen jumys istep, nátıjesin kóretin bolamyz» deıdi Anastasııa.
Balalar ortalyǵynyń ereksheligi, olarǵa art-terapııa, peskografııa, teatr óneri sabaqtary oıyn túrinde ótkiziledi. Bul kishkenatı búldirshinderge óte unaıdy, sabaqtan jalyqpaıdy. Anastasııa aldaǵy ýaqytta balalardy saýyqtyrý sabaqtaryn qosatyn bolady. Kásipker ortalyqtyń jeke ǵımaraty, saýyqtyrý bólmeleriniń bolýyna jumys isteıtin josparlarymen de bólisti.
Názıra Járimbet,
«Egemen Qazaqstan»
Qostanaı
