Ákim kópbalaly analarmen № 55 mektepte kezdesti. Sondaı-aq, kezdesýge QR Eńbek jáne halyqty áleýmettik qorǵaý mınıstri Berdibek Saparbaev, Bilim jáne ǵylym vıse-mınıstri Bıbigúl Asylova, Densaýlyq saqtaý vıse-mınıstri Oljas Abıshev, IIDM Qurylys jáne turǵyn úı-kommýnaldyq sharýashylyq isteri komıtetiniń tóraǵasy Marhabat Jaıymbetov qatysty.
Baqyt Sultanovtyń habarlaýynsha, elordada 10 095 kópbalaly otbasy turady. Olardyń 4 688-i – «Altyn Alqa» jáne «Kúmis alqa» ıegerleri, 3458 adam nemese 684 otbasy – az qamtylǵandar. 25 719 múmkindigi shekteýli jan bar. Olardyń 5316-y – múgedektigi bar balalar.
Qazirgi kúni ákimdik turǵyndardy keshendi áleýmettik qoldaý qyzmetteri men sharalarynyń keshenin ázirledi, onda 13 áleýmettik is toptastyrylǵan. Sonymen qatar, ákimdik 2 myńnan astam otbasynyń kommýnaldyq tólemin tóleýdi arttyrýdy, múgedek jandy kútetin janǵa qoǵamdyq kólikte tegin júrý qarastyrylǵan, kútimdi qajet etetin balalarǵa beriletin kómekti 25 myńǵa deıin arttyrý kózdelgen (6,5 AEK-ten 10 AEK deıin). Memlekettik áleýmettik tapsyrys sheńberinde tegin tehnıkalyq jáne kásiptik bilim berý usynylady.
«Qoldaýdy odan ári de jalǵastyramyz. Ol úshin biz bıýdjetti ońtaılandyramyz da únemdelgen qarajatty áleýmettik salaǵa jumsaımyz. Osyǵan baılanysty qalalyq bıýdjetten kópbalaly jáne az qamtylǵan otbasylardy qoldaýǵa 3,2 mlrd. teńge bólingen. Qosymsha 8 áleýmettik kómek qarastyrylady. Naqtyraq aıtqanda, kópbalaly otbasydan shyqqan oqýshylarǵa, stýdentterge qoǵamdyq kólikte tegin júrý qarastyrylǵan. Kópbalaly otbasydan shyqqan 1-11 synyp oqýshylary tegin ystyq tamaqpen qamtamasyz etiledi. Osyǵan 971 mln teńge qarastyrylǵan, ol qatarǵa 32 myń bala kirip otyr», – dedi ákim.
Odan bólek, osy balalar tegin mektep formasymen jáne oqýǵa qajet kerek-jaraqpen qamtamasyz etiledi.
Kópbalaly jáne az qamtylǵan otbasylardyń balalaryna, sondaı-aq múmkindigi shekteýli balalarǵa balabaqshalardan tegin oryn beriledi.
Sonymen qatar, kópbalaly otbasydan shyqqan 180 balaǵa qalamyzdaǵy JOO-na arnaıy granttar beriledi.
«Kópbalaly analarǵa stomatologııalyq qyzmetter (sanasııalaý, protezdeý) tegin usynylatyn bolady. Bıýdjetti qarastyrǵan soń kópbalaly otbasylar qatty otyn alatyndar kategorııasyna kirgiziletin bolady», – dedi Baqyt Sultanov.
