Endi kólik júrgizýshileri avtokólikterdi qaıta tirkeý jáne júrgizýshi kýáligin aýystyrý sııaqty memlekettik qyzmet túrlerin Q.Túlemetov kóshesi, 35 meken jaıda ornalasqan front-ofıste júzege asyra alady. Jańa mamandandyrylǵan HQO memlekettik korporasııanyń Shymkent qalasyndaǵy turǵyndarǵa memlekettik qyzmet kórsetetin on birinshi front-ofıske aınalyp otyr.
Jańa mamandandyrylǵan HQO-da 52 qyzmetker jumys isteıdi, al daıyn qujattardy qabyldaý jáne berý boıynsha 20 jumys orny qurylǵan. Mamandandyrylǵan HQO jańa jıhazben jabdyqtalǵan, 150 avtokólikke arnalǵan turaq ta bar, múmkindigi shekteýli azamattar úshin pandýstar men shaqyrtý túımeleri qarastyrylǵan.
Atalǵan ortalyqtyń ashylý saltanatyna qala ákiminiń orynbasary Danat Jýmın, «Azamattarǵa arnalǵan úkimet» basshylyǵy jáne qalalyq Polısııa basqarmasynyń bastyǵy Eraly Jumahanbetov qatysty.
«Shymkent mıllıon turǵyny bar jeke qala statýsyn aldy. Eksterrıtorıaldylyq qaǵıdaty boıynsha munda jaqyn jatqan aýdandardan da kólikteriniń qujattaryn jasatý úshin júrgizýshiler kóp keledi. Bul rette biz turǵyndardyń ótinishterin eskerip, taǵy bir mamandandyrylǵan HQO ashyp otyrmyz. Jyl basynan beri Shymkenttegi alǵashqy mamandandyrylǵan HQO arqyly azamattarǵa 45 myń júrgizýshi kýáligi berildi jáne avtokólikti qaıta tirkeý boıynsha 200 myńnan astam qyzmet kórsetildi» dedi mamandandyrylǵan HQKO basshysy Dáýlet Dúısenbekov.
Shahardaǵy ekinshi HQO ǵımaratynda kólik quralyn tirkeýge jáne qaıta tirkeýden ótkizýge, júrgizýshi kýáligin aýystyrýǵa bolady. Ázirge A, A1, B, B1, C, C1, D, D1 júrgizýshi kategorııalary boıynsha praktıkalyq emtıhan tapsyrý jáne medısınalyq tekseristen ótý jumystary Dostyq móltek aýdanyndaǵy mamandandyrylǵan HQO-da ǵana júzege asyrylady.
Nurshat TО́KEN,
«Egemen Qazaqstan»
Shymkent
