О́tken jyly Elbasy «Rýhanı jańǵyrý» baǵdarlamasy aıasynda áleýmettik máselelerdi sheshýge baǵyttalǵan «Aýyl – el besigi» arnaıy jobasyn ázirldeýdi tapsyrǵan bolatyn. Alaıda, jalpy otyrysta Ulttyq ekonomıka mınıstrliginiń ókilderi atap ótkendeı, atalǵan joba taıaý ýaqytta bekitilmek.
Osyǵan oraı Májilis Tóraǵasy:
- Nege keshiktirilip jatyr? Úsh jyldyq bıýdjet bekitildi, aqsha bólindi. Al, Sizder áli baǵdarlamany kelise almaı otyrsyzdar. Baǵdarlama bolmasa – bólingen aqsha da ıgerilmeıdi. Bul jaǵdaı jaýapsyzdyqtan týyndap otyr?– dedi Ulttyq ekonomıka vıse-mınıstrine.
Sondaı-aq, Palata Spıkeri Aýyl sharýashylyq mınıstrin de osy baǵdarlamany úılestirýge shaqyryp, ınfraqurylymnyń damýy – aýyl turǵyndarynyń ómir súrý sapanyń basty faktory, - dedi.
Otyrys barysynda «Qazaqstan Respýblıkasynyń keıbir zańnamalyq aktilerine agroónerkásiptik keshendi retteý máseleleri boıynsha ózgerister men tolyqtyrýlar engizý týraly» zań jobasy birinshi oqylymda maquldandy.
Zańnamalyq qujat Agroónerkásiptik keshendi damytýdyń 2017 – 2021 jyldarǵa arnalǵan memlekettik baǵdarlamasynyń negizgi erejelerin iske asyrýǵa baǵyttalǵan.
Jobada usynylǵan ózgerister men tolyqtyrýlar ósimdikterdi qorǵaý jáne olardyń karantıni, veterınarııalyq qaýipsizdikti qamtamasyz etý, sýmen qamtamasyz etý, ósimdikter men janýarlar dúnıesin saqtaý jáne damytý jónindegi normalardy, sondaı-aq agroónerkásiptik keshendegi memlekettik saıasattyń tıimdiligin arttyrýdy kózdeıdi.
Zań jobasynda astyq qabyldaý kásiporyndarynyń qyzmetindegi ákimshilik kedergiler joıylady. Endi astyq qabyldaý kásiporyndary kirme temirjoldardy usynýǵa, jarma ónimderin ótkizýge, maıly tuqymdardy qaıta óńdeýge jáne ótkizýge baılanysty ilespe qyzmetterdi kórsete alatyn bolady.
Sondaı-aq Qazaqstan Respýblıkasynyń zańnamasyn Eýrazııalyq ekonomıkalyq odaqtyń normatıvtik quqyqtyq aktilerine sáıkes keltirýge baǵyttalǵan ózgerister engizilip otyr.
Qujatty qaraý barysynda depýtattar zań jobasynyń negizgi erejelerin naqtylaýǵa baǵyttalǵan birqatar ózgerister men tolyqtyrýlar engizdi.
Atap aıtqanda, orman sharýashylyǵy jáne erekshe qorǵalatyn tabıǵı aýmaqtar men sý sharýashylyǵy salasynda jáne jer resýrstaryn utymdy paıdalaný, janýarlar dúnıesin qorǵaý, ósimin molaıtý jáne paıdalaný salasynda, sondaı-aq, agrarlyq ǵylymdy damytý, aýyl sharýashylyǵy salasyndaǵy kadrlardy daıarlaý júıesin jetildirý, bıznestiń ǵylymı jáne ǵylymı-tehnıkalyq qyzmetti qosa qarjylandyrýǵa qatysýyn yntalandyrý maqsatynda birqatar usynystar engizdi.
Jalpy otyrysta Qazaqstan men Reseı Úkimetteri arasyndaǵy M.V. Lomonosov atyndaǵy Máskeý memlekettik ýnıversıtetiniń Qazaqstandyq fılıalynyń jumys isteýi týraly kelisimdi ratıfıkasııalaý týraly zań jobasy maquldandy.
Qazaqstan Respýblıkasynyń Tuńǵysh Prezıdenti Nursultan Ábishuly Nazarbaev 2000 jyly M.V.Lomonosov atyndaǵy Máskeý memlekettik ýnıversıtetiniń Qazaqstandaǵy fılıalyn ashý jóninde bastama kótergen bolatyn.
Sol jyly 9 qazanda Reseı Prezıdenti V.V. Pýtınniń Qazaqstanǵa jasaǵan sapary kezinde Fılıaldyń qurylýy týraly hattamaǵa qol qoıyldy. Fılıal osy ýaqytqa deıin L.N. Gýmılev atyndaǵy Eýrazııa ulttyq ýnıversıtetiniń bazasynda qyzmet etýde.
Osyǵan sáıkes, M.V. Lomonosov atyndaǵy Máskeý memlekettik ýnıversıtetiniń Qazaqstandyq fılıalynyń jumys isteýi týraly Kelisimge 2017 jylǵy 9 qarashada Chelıabınsk qalasynda qol qoıylǵan bolatyn. Kelisim Fılıaldyń jumys isteýin retteıdi.
Fılıalda oqytý Máskeý memlekettik ýnıversıtetiniń oqý baǵdarlamalary negizinde júzege asyrylady. Sonymen birge, Kelisimde Qazaqstannyń joǵary oqý oryndarynda kózdelgen kólemde Qazaqstan tarıhy men qazaq tilin mindetti túrde oqytý qarastyrylǵan.
Budan basqa, oqý josparlarynda Qazaqstan ekonomıkasynyń erekshelikteri eskeriledi. I jáne II kýrstarynda Qazaqstandy jańǵyrtýdyń ózekti problemalary týraly áleýmettik-gýmanıtarlyq pánder sıkly oqytylady.
Qazaqstan Fılıaldyń qyzmetine múlikti óteýsiz berý, jáne bilim granttaryn bólý arqyly qatysady. Fılıal múlki eshkimge bere almaıdy, onyń qyzmeti aıaqtalǵan jaǵdaıda múlik Qazaqstanǵa qaıtarylady. Jyl saıynǵy qabyldaý jospary 125 stýdent jáne 40 magıstrantty quraıdy. Búginde Fılıalda 605 stýdent bilim alýda.
Jalpy otyrys sońynda halyq qalaýlylary ortalyq memlekettik atqarýshy organdardyń basshylaryna birneshe depýtattyq saýaldar joldady. Olar M.Mahambetov, A.Qońyrov, D.Espaeva.
