"Mıras" respýblıkalyq keńesiniń músheleri men zııaly qaýym ókilderiniń atalǵan máseleler boıynsha pikirleri tushymdy boldy. Táýelsizdigimizdi alyp, egemendi el bolýymyzda Elbasynyń etken eren eńbegine eshkimniń de kúmáni joq ekendigi aıtyldy. QR Parlamenti Májilisiniń depýtaty Bekbolat Tileýhan «Sonaý 1998 jyly Jetisýdyń jyly jeli esken Alataýdyń baýraıy Almatydan aıazy azynaǵan Aqmolaǵa kóshýdi Nursultan Ábishuly óziniń múddesi úshin jasaǵan joq. Saryarqanyń tórine jańa astananyń qazyǵyn qaqqan Elbasynyń sol kezdegi kóregen saıasaty eldi alǵa qaraı jeteledi» dedi. QR Prezıdentiniń Astanany Nur-Sultan qalasy dep qaıta ataý týraly Jarlyqqa qol qoıýy Elbasy salǵan baǵyttyń jalǵasatyndyǵyn bildiretindigin, der kezinde jasalǵan sheshim bolǵanyn zııaly qaýym ókilderi tilge tıek etti.
- Halyq arasynda «Qalanyń atyn ózgertý qyrýar qarjyny qajet etedi», «Barlyq qujattardy aýystyrý kerek» degen sııaqty alyp-qashpa áńgimeler júrip jatyr. Men sizderge osyǵan baılanysty Ádilet mınıstrliginiń aqparatyn jetkizgim kelip otyr. Elorda ataýynyń ózgerýi azamattarǵa satyp alý-satý, syıǵa tartý, aýystyrý, paıdalanýǵa qabyldaý syndy jyljymaıtyn múliktiń quqyn belgileıtin qujattardy, sonymen qatar týý týraly, ólgeni týraly, neke qııý/buzý týraly azamattyq hal-aqýal aktilerin tirkeý qujattaryn aýystyrý mindetin júktemeıdi. Atalǵan qujattarda elordanyń burynǵy ataýynyń jazylýy olardy jaramsyz qylmaıdy, - dedi Bekbolat Tileýhan.
Saıasattyń zańymen 1998 jylǵy tarıhtyń jabýly qazan jabýly kúıinde qalǵan eski paraqtaryn aqtarǵan Qýanysh Sultanov dál sol kezdegi Elbasynyń qanshama qarsylyqqa qaramastan belin bekem býyp, astanany kóshirip, jasaǵan áreketiniń búgingi jemisine erekshe qýandy. Kórshiniń kóleńkesine sińip keter qaýpi tóngen óńirlerimizdiń búginde órkendep kele jatqany Elbasynyń arqasy ekenin jasyrmady. Elordany Tuńǵysh Prezıdentimizdiń atymen ataý oryndy dedi.
Qoǵam qaıratkeri Myrzataı Joldasbekov «Bitken iske synshy kóp» deı kele, qanshama dana tulǵalardyń qazaq tarıhynda bolǵandyǵyna, biraq Nursultan Ábishulynyń orny erek ekenin basa aıtty. Qazaq jaqsylyqqa jaqsylyq jasaı biletin, izgilikke alǵysyn aıta biletin halyq emes pe? Beıbit zamanda, kóziniń tirisinde nege qurmettep, tóbemizge kótermeske degen oıyn túıdi.
Ekinshi másele boıynsha, «Baqýatty qoǵam: onjyldyqtyń 10 maqsaty» atty baǵdarlamanyń júzege asyrylýyn "Mıras" respýblıkalyq keńesi basty nazarda ustaıtyn boldy. QR Parlamenti Májilisiniń depýtaty Saýytbek Ábdirahmanov Elbasynyń "Nur Otan" partııasynyń HVIII sezinde Qazaqstan áleýmettik memleket ekendigine erekshe toqtalyp, halyqtyń ál-aýqatyn kóterýdi tapsyrǵanyn jáne bul baǵdarlamanyń mańyzyna toqtaldy.
Al, Halyqaralyq Túrki akademııasynyń prezıdenti Darhan Qydyráli atalǵan qujattyń shalǵaıdaǵy aǵaıynnyń jaǵdaıyn jaqsartýǵa arnalǵan baǵdarlama bolatynyn jáne bul "Nur Otan" partııasynyń naǵyz halyqtyq partııa ekendigin dáleldeıtinin atap ótti. Elordanyń ataýyn ózgertýge qatysty da pikirin bildirdi.
"Nur-Medıa" holdıngi Bas dırektorynyń orynbasary Maksım Spotkaı "Mıras" respýblıkalyq keńesi aldaǵy ýaqytta baǵdarlama negizinde monıtorıng jasap, jaǵdaıdy baqylaý kerek dep usynys aıtty. Elbasynyń saıasatyn jalǵastyrý úshin baǵdarlamany tıisinshe júzege asyrý kerektigin atady. Jasalǵan usynystyń barlyǵyn qaıta qarap, "Mıras" respýblıkalyq keńesiniń músheleri iske kirisetin boldy.
