Forým uıymdastyrýshylary sharanyń abyroımen ótýine bar kúsh-jigerin jumsap jatyr. Forýmnyń negizgi maqsaty – ár áıel óziniń baǵasyn, qoǵamda qurmetke laıyq ekenin kórsetý. Bul forým bıylǵy jyly jańa formatta ótedi. Árbir qatysýshy ózin –ózi tanystyryp qyzyl kilemde júredi.
Aıta ketsek, «Asyl ana» forýmyniń negizi 2016 jyly qalanǵan. Raıgúl Muqasheva jáne Gúlbary Myrzaǵalıeva negizin qalǵan forým alǵash ret Aqtóbe qalasynda ótken bolatyn. Sharadan túsken qarajattyń jartysy Aqtóbedegi «Analar úıine» beriledi. Uıymdastyrýshylar 2018 jyly jobanyń aýqymyn keńeıtip, Qazaqstannyń basqa da qalalaryn qamtý týraly sheshim qabyldady.
Sharada arnaıy «Asyl Ana» júldesimen marapattaý rásimi bolady. Odan basqa da nomınasııalar qarastyrylǵan. Forýmǵa bala tárbıesi men jumysyn qatar alyp júrgen barlyq áıel qatysa alady. Júlde bala tárbıesimen aınalysa otyryp, óz-ózin damytýdy jolǵa qoıǵan áıelderdi yntalandyrý úshin taǵaıyndalyp otyr. Olar ómir jolynda adam qyzyǵarlyqtaı jetistikterge jetip, ózin moıyndata bilgen jandar. Sharaǵa qoǵam qaıratkerleri de qatysyp, qatysýshylar men qonaqtarǵa qýanysh syılaıdy dep josparlanyp otyr.
Odan bólek shara barysynda balalar men áıelderge arnalǵan jármeńke ótetin bolady. Shara uıymdastyrýshylarynyń aıtýynsha, osyndaı aýqymdy shara ótkizý olar úshin úlken maqtanysh ári zor jetistik. Sharada otbasy demalysyndaǵy analar men isker áıelderdiń kezdesýi josparlanǵan.
