Taldyqorǵanda ótken marqumdardyń janazasyna Qorǵanys mınıstri Nurlan Ermekbaev, Qazaqstan musyldandary diniı basqarmasynyń tóraǵasy, Bas múftı Serikbaı qajy Oraz, Almaty oblysynyń ákimi Amandyq Batalov qatysty.
Qaıǵyly oqıǵa 27 naýryz kúni Qyzylorda oblysynyń aýmaǵynda bolǵan edi. Oqý-jattyǵý oıyndaryna qatysý úshin áýege kóterilgen áskerı tehnıka tosynnan apatqa ushyryp, tikushaq bortyndaǵy 13 adam túgeldeı qaza tapty. Azamattyq boryshyn atqarý barysynda qaza tapqan jaýyngerlerdiń arasynda Almaty oblysynda týyp-ósken 8 azamat bolǵan. Búgin jetisýlyqtar marqumdardy aqtyq saparǵa shyǵaryp saldy.
Buǵan deıin qaza tapqan áskerı qyzmetshilerdiń otbasymen Qorǵanys mınıstrliginiń atynan kezdesken Taldyqorǵandaǵy 21/751 áskerı bólim komandıriniń orynbasary Bekbolat Jumabaev marqumdardyń týǵan-týystaryna materıaldyq kómek kórsetiletinin aıtty. Atap aıtqanda, Qorǵanys mınıstrligi jaýyngerlerdińdiń otbasy turyp jatqan úıdi jekeshelendirip bermek nemese olarǵa baspana satyp alý úshin qarjy bóledi. Sondaı-aq, oblys ákimdigi tarapynan da qaza bolǵandardyń otbasyna áleýmettik jeńildikter men tólemder jasalady. Bul týraly Almaty oblysynyń ákimi Amandyq Batalov qaza bolǵandardyń jaqyndary men týǵan-týystaryna kóńil aıtý barysynda málimdedi.
Almaty oblysy
