Mindetin adal atqarýda
Sársenbi, 4 qańtar 2012 7:07
Beıbit adamdardyń ómirine qaýip tóngende óz ómirlerin ózgeler úshin oılanbaı qııa alatyn polısııa qyzmetkerleri ekendigi, olardyń syn saǵattaǵy batyl da utymdy qımyldary tynyshtyqty saqtap qalatyndyǵy, el úshin, jer úshin namysty qoldan bermeıtindigi qazir aıtpasa da barshaǵa aıan. Mundaı sanattaǵy polısııa qyzmetkerleri Almaty qalasynyń IID-inde kóptep qyzmet etedi. Solardyń birqatary Táýelsizdiktiń 20 jyldyǵy qarsańynda arnaıy marapatqa ıe boldy.
Sársenbi, 4 qańtar 2012 7:07
Beıbit adamdardyń ómirine qaýip tóngende óz ómirlerin ózgeler úshin oılanbaı qııa alatyn polısııa qyzmetkerleri ekendigi, olardyń syn saǵattaǵy batyl da utymdy qımyldary tynyshtyqty saqtap qalatyndyǵy, el úshin, jer úshin namysty qoldan bermeıtindigi qazir aıtpasa da barshaǵa aıan. Mundaı sanattaǵy polısııa qyzmetkerleri Almaty qalasynyń IID-inde kóptep qyzmet etedi. Solardyń birqatary Táýelsizdiktiń 20 jyldyǵy qarsańynda arnaıy marapatqa ıe boldy.
Qyzmetterinde eń joǵary kórsetkishterge qol jetkizgen tártip saqshylaryn Almaty qalalyq IID bastyǵy, polısııa general-maıory Erlan Turǵumbaev marapattady. Ol polıseılerge ordender men medaldar tapsyryp, tártip saqshylaryn arnaýly marapat qaǵazdarymen quttyqtady. Olardyń ishinde arnaıy jedel áreket etý jasaǵynyń sarbazdary da boldy.
«Arnaıy jasaqtyń saqshylary tepse temir úzetin, qıyn jaǵdaıda shuǵyl áreket etýge qabiletti, tájirıbeli qyzmetkerler. Osy jigitterdiń kásibıligi men qaısarlyǵynyń arqasynda kóptegen qylmystar men quqyq buzýshylyqtar aýyzdyqtalyp, halyqtyń tynysh ómirine kepildik berilip keledi. Bul jasaqtyń qyzmetkerlerine sportpen úzbeı aınalysýlaryna bar jaǵdaı jasalǵan», – deıdi E.Turǵumbaev.
Almaty qalalyq IID men barlyq aýdandyq bólimderi qala tynyshtyǵyna bir kisideı jumyldyrylǵan. Munda kún-tún demeı, demalyssyz bes myńnan astam saqshy eńbek etýde. Tehnıkalyq jaraqtaný múmkindigi mol, kásibı mamandar arasynda memlekettik joǵary marapattarǵa 19 polısııa qyzmetkeri usynylyp, onyń 15-i «Dańq» jáne «Aıbyn» ordenderimen nagradtalǵan. Beıbit kúndegi qylmysqa qarsy kúreste 142 almatylyq tártip saqshysy túrli jaraqattar alsa, 18 qyzmetker qyzmet barysynda qaza tapqan.
Ústimizdegi jyly Prezıdent N.Á.Nazarbaev birneshe asa aýyr qylmys jasaǵan qarýly qylmystyq toptyń kózin joıǵan «Suńqar» arnaıy bólimshesiniń sarbazdaryn II dárejeli «Aıbyn» ordenimen nagradtaý týraly Jarlyqqa qol qoıdy. «Suńqar» shabýylshylaryn marapattaý rásimine IIM Ishki ásker qolbasshysy general-maıor Rýslan Jaqsylyqov kelip, ózderiniń qyzmettik boryshyn abyroımen atqarǵan polıseılerge saltanatty túrde memlekettik nagradalar tabys etti jáne bólimsheniń barlyq jeke quramyna alǵys bildirdi. Segiz sarbazǵa II dárejeli «Aıbyn» ordeni tabys etildi, arnaıy bólimsheniń taǵy tórt qyzmetkeri «Erligi úshin» medalimen marapattaldy. Áli kúnge deıin em qabyldap jatqan «Suńqardyń» eki qyzmetkerine IIM men Almaty qalasynyń IID basshylyǵy olardyń nagradalaryn aýrýhanada tapsyrdy.
«Suńqar» jáne basqa bólimshelerdiń qoǵamdyq tártipti qamtamasyz etý jumystary óte joǵary jaýapkershilikti talap etedi, al keı jaǵdaılarda olardyń ómiri qaterge tolady. Biraq mundaı qaýipti shaq arnaıy daıyndyqty, sonymen birge, sabyrlylyqty, tózimdilik pen janqııarlyqty da talap etedi. Búgingi tańda arnaıy jedel sharalar kezinde jaraqat alǵan eki sarbaz ǵana aýrýhanada jatyr, al qalǵandary qazir sapta. Olardyń erligin Memleket basshysy, IIM basshylyǵy men azamattar joǵary baǵalady. Bul oraıda Erlan Turǵumbaev polısııanyń osy bólimshesinde óz isiniń naǵyz sheberleri, rýhy kúshti, tabandy jáne adal adamdar qyzmet etetinin atap aıtty. «Bular myńdaǵan arnaıy sharalardy sátti aıaqtaǵan, kóptegen qaýipti qylmyskerlerdi quryqtaǵan adamdar. Bul bólimsheniń árbir qyzmetkeri Otanyna qaltqysyz qyzmet etedi. Olardyń isiniń nátıjesi – azamattardyń qaýipsizdigi», – deıdi basshylyq.
Jalpy, tarıh qoınaýyna engen 2011 jylda eldi eleń etkizgen oqıǵalar jeterlik. Sonyń biri – Almaty qalasynda 35 jastaǵy ómirden túńilgen kelinshektiń sábıin 5-qabattan laqtyryp jibergeni edi. Estigen eldiń jaǵasyn ustatqan bul oqıǵanyń qaıǵyly aıaqtalmaýyna der kezinde kómekke kelgen saqshylardyń erligi men kásibıligi ǵana sep boldy.
Túsinikti bolýy úshin oqıǵany basynan baıandaıyq. Áýezov aýdanyndaǵy shaǵyn aýdandardyń birinde turatyn áıeldiń baýyr eti balasy – nebári 3 jastaǵy ulyn óltirmekke bel býǵany týraly dabyl túsisimen, oqıǵa ornyna alǵashqylardyń biri bolyp qalalyq IID PPP-nyń «Boran-086» músheleri jetedi. Balasyn óltirýdi, artynan ózine de qol salýdy oılaǵan kelinshektiń essiz áreketin toqtatý úshin ekıpaj múshesi, aǵa leıtenant Serik Japarov úıdiń shatyryna kóteriledi. Al bul kezde onyń kómekshisi, polısııa aǵa serjanty Zaıtjan Aıýpov ólimge bas tikken áıeldi sózge tartyp, kelissóz júrgizip turǵan. Bir kezde ashýǵa býlyqqan kelinshek qolyndaǵy balasyn 5-qabattan laqtyryp jiberip, artynsha ózi de sekiredi. Osy sátte shatyrdan tómen quldılaǵan balany aǵa serjant qas qaǵym sátti qalt jibermeı asa eptilikpen qaǵyp alady. Ne bolyp, ne qoıǵanyn túsinbegen sábı tars jumǵan kózin ashqanda ózine kúlimsirep qarap turǵan jyly júzdi beıtanys adamdy kóredi. Degenmen, qatty shoshynyp qalǵan sábıge psıhologııalyq kómek kórsetý úshin jedel járdem qyzmetkerleri ony 1-qalalyq balalar aýrýhanasyna jetkizedi. Al aýyr jaraqat alǵan áıel qalalyq 7-klınıkalyq aýrýhanasyna jóneltiledi.
Qysyltaıań sátte sabyrlylyq saqtap, qyraǵylyq tanytqan aǵa serjant Zaıtjan Aıýpovtyń bul erligi eleýsiz qalǵan joq. Ol Memleket basshysynyń Jarlyǵymen «Erligi úshin» medalimen marapattaldy. Patrýldik polısııa qyzmetkerine bul marapatty qala ákimi Ahmetjan Esimov tabys etti.
«Eń bastysy, marapattalýda emes, búldirshinniń amandyǵynda ǵoı. Sábıdiń jaǵdaıyn bilip, aýrýhanaǵa baryp turamyn. Men tek ózime júktelgen mindetimdi abyroımen atqardym dep senimdi túrde aıta alamyn. Osyndaı deńgeıdegi marapatqa ıe bolý úlken mártebe», – deıdi aǵa serjant Zaıtjan Aıýpov. Mine, bizdiń qalada mundaı polısııa qyzmetkerleri barshylyq.
Gúlnár JAMANQULOVA, Almaty qalasy IID qyzmetkeri.
ALMATY.
