Kıno naryǵynda ótkir qoıylyp otyrǵan osy máselemen múddeli jandar arnaıy aınalyspasa, rejısserdiń eńbegi esh, tuzy sor bolǵany – bolǵan.
Sóıtse de qoǵamnyń ósýine kerekti, kórermen talǵamyn jańa sapaǵa kóteretin kórkem týyndylardyń negizgi qozǵaýshy kúshi kommersııalyq fılmder ekeni belgili boldy. Kıno – qymbat óner. Sapaly óner úlken qarjynyń qoldaýymen ǵana dúnıege keledi. Buǵan bıik ónerdi jasaıtyn shyǵarmashylyq tulǵalardyń da, qarapaıym adamdardyń da kózi ábden jetti. Al talantty rejısserlerdiń bárine mınıstrlik bóletin qarjy jete bermeıdi, ol úshin «Qazaqfılmge» kezekke turýy kerek, kezegi kelip jetkenshe shyǵarmashylyq shabytynan aıyrylyp, pisip-jetilip turǵan oıy men ıdeıasy solǵyn tartyp qalýy múmkin.
Mine, osy jaǵdaıdyń bárin saraptaı kelip, óner salasynda eńbek etip júrgen shyǵarmashylyq ujymdarǵa ınvestorlar tartyp, otandyq jáne álemdik kıno naryqqa qazaqstandyq sapaly týyndylardy usynýdy maqsat etken «Bilte invest» kompanııasy otandyq kınoındýstrııa salasymen birlese jumys isteýdi qolǵa almaq. Investısııalyq kompanııanyń irgetasyn kótergen quryltaıshylarynyń biri qarjyger, prodıýser Edige Qojahmettiń aıtýynsha, búgingi kúnge deıin qazaqstandyq kıno men shoý-bıznes naryǵy iri bıznes ókilderi men ınvestorlar tarapynan maqsatty túrde qoldaý kórgen joq. О́ner men qarjy bir-birimen tyǵyz baılanysty bolsa da, ekeýiniń aty qatar atalmady, al atalǵandaı bolsa, ol tek bir jaqty mesenattyq turǵydan ǵana baılanystyrylatyn edi. Qazir naryq qalyptasyp keledi, tabystylyq turǵysynan qazaqstandyq ınvestorlar bul salaǵa endi kóńil aýdara bastady. Belgili rejısser Satybaldy Narymbetov te mundaı ıgi bastamany qoldaıtynyn jáne elimizdegi kınoındýstrııa salasyn damytýda dál osyndaı sharalardyń qolǵa alynyp jatqanyna qýanyshty ekenin bildirdi.
«Bilte invest» kompanııasy, kommersııalyq kınodan bastap, medıa jáne oıyn-saýyq salasyna, tipti ıýtýb jobalaryna deıin ınaestısııa salýdy kózdeıdi. Qazirgi ýaqytta qazaqstandyq, malaızııalyq jáne japonııalyq ınvestorlar jobalardy júzege asyrýǵa bilek sybana kirisip te ketken. Tájirıbe retinde alǵashqy kınoǵa qarjy salynyp, ol qazir prokatqa shyǵýǵa daıyndyq ústinde. Dál búginnen bastap elimizdiń barlyq kınoteatrlarynda kórermenge jol tartatyn fılm «Mama + Papa» dep atalady. Sondaı-aq, kompanııa tek kıno ǵana emes, mýzyka salasyndaǵy prodıýserlerdi, shoý-bıznes ókilderin de seriktestikke shaqyryp otyr.
«Bilte invest» kompanııasy kommersııalyq maqsatta qurylǵanymen, jumys babynda ulttyq, adamzattyq qundylyqtardy dáripteýge, adamgershilikti, izgi qadir-qasıetterdi úlgi tutýǵa barynsha mán beredi. Sonymen qatar qazaqstandyq shoý-bıznes jáne kınoónimderin eksporttaý boıynsha júıeli jumys atqarý josparlanyp otyr», – dedi Edige Qojahmet.
Qazaqstan kınosyna qarjy salýǵa yqylas tanytyp otyrǵan malaızııalyq kásipker Haırýl Nazım sońǵy jyldary bizdiń elimizdiń kıno ónerin qadaǵalap júrgenin, sondyqtan talantty shyǵarmashylyq toptyń áleýetine senim bildiretinin, al munyń óz kezeginde Malaızııa men Japonııanyń, jalpy Azııanyń kıno prokatynda jaqsy múmkindik syılaıtynyn jetkizdi.
«Bilte invest» bıyldyń ózinde bes kınokartınaǵa ınvestısııa salýdy josparlap otyr. Onyń ishinde taza Qazaqstan naryǵyna arnalǵan kommersııalyq fılmder jáne halyqaralyq naryqqa arnalǵan fılmder bar. Kompanııanyń taǵy bir quryltaıshysy Aljanbek Bolysbekulynyń pikirinshe, qarjysyn kópshiliktiń rýhanı talǵamyn qalyptastyrýǵa jumsaǵan kásipker kóp nárseden utady. Bul bir jaǵy, osy saladan turaqty tabys kórgisi keletinderge jaqsy múmkindik bolsa, eń bastysy, seriktes kásipkerlerdiń qarjysy adam úshin izgi, paıdaly maqsatqa qyzmet etedi.
ALMATY
