Sporttyq ári qaıyrymdylyq sharasynyń ótýine uıytqy bolǵan Nur-Sultan qalasy ákimdiginiń «Rýhanııat» KMM basshysy Erjan Eńsebaı:
- Bul týrnır buqaralyq sportty, salaýatty ómir saltyn nasıhattaý baǵytynda jáne qaıyrymdylyq maqsatynda ulystyń uly kúni Áz Naýryz meıramy aıasynda uıymdastyrylyp otyr. Qatysýshy komandalardan jınalǵan qarajat elordada turatyn áleýmettik jaǵdaıy tómen 3 otbasyǵa, dálirek aıtqanda, biri 8 balaly múgedek jan bolsa, ekinshisi – temir vagonda kúneltip júrgen kóp balaly ana, sondaı-aq, jaqynda ǵana elordada avtobýstar soqtyǵysqan jol kólik oqıǵasynda múgedek bolyp qalǵan turǵynnyń joldasyna berildi. Olardyń árqaısyna 68 000 teńge jáne qosymsha demeýshilik jasaǵan «AFFORD» kıim dúkeniniń 30000 teńgelik sertıfıkatyn tabystadyq. Sharaǵa atsalysyp, oıyn kórigin qyzdyrǵan azamattarǵa jáne sport zalymen qamtamasyz etkeni úshin Qazaqstan Musylmandary Dinı basqarmasyna alǵysymyzdy bildiremiz, deıdi.
Eki topqa bólinip oınaǵan 8 komandanyń ishinde «Jaıdarman» komandasynyń ázilkesh jigitteriniń baǵy men baby basym bolyp, bas júldeni jeńip alsa, osy komandanyń oıynshysy Danııar Bekjanov «Úzdik qorǵaýshy» atandy. Týrnır basynan-aq erekshe minez ben ózgeshe oıyn órnegin kórsetken «Astankıno» komandasynyń fınalda ǵana joly bolmaı, júldeli 2-oryndy mise tutty. Atalmysh komandanyń qaqpasyn kúzetken Qýanysh Qasenovtiń «Úzdik qaqpashy» atanǵanyn aıta keteıik. Al, fınalda júzdesken qos myqtyǵa jartylaı fınalda jol bergen «Darabozdar» men «Jalyn» komandalary 3-oryndy ózara sarapqa salǵan bolatyn. Nátıjesinde «Jalyn» komandasy qarsylastarynan basym tússe, osy komandanyń namysyn qorǵaǵan Marat Orazalıev «Úzdik oıynshy» atandy. «Darabozdar» sapyndaǵy Marat Havsemet «Úzdik shabýylshy» atansa, uıymdastyrýshylar osyndaı qaıyrymdylyq týrnırin aldaǵy ýaqytta dástúrli túrde ótkizýdi josparlap otyr.
