Qazaqstan • 02 Sáýir, 2019

Akademıktiń 100 dollarlyq júldesi

633 ret

kórsetildi

3 mın

oqý úshin

«Egemen Qazaqstan» gazeti 13 jyl buryn ǵalym, fızıka-matematıka ǵylymdarynyń doktory, UǴA akademıgi Asqar Jumadildaevtyń stýdentterdi qulshyndyrý maqsatynda baıqaý jarııalaǵany týraly habar ázirlegen edi. Jastar arasyndaǵy bul jarystyń máni qarajat kóleminde emes, mańdaı termen kelgen akademıktiń qolynan alatyn júldede bolatyn.

Aınash ESALI

– Bul ıdeıa meniń 50 jyldyq mereıtoıymnan bastaldy. Sodan beri elimizdiń túkpir-túkpirindegi kásipkerler bul bastamany qoldap, demeýshilik bildirýge nıet tanytty. Jasyrǵan esebimdi kim shyǵarsa, 100 dollar alady, bir jylda shyqpasa, kelesi jyly syıaqy quny 200 dollarǵa ósedi. Jyldan-jylǵa syıaqy arta beredi. Ázirshe, meniń jasyrǵan úsh jyldyq esebimdi shyǵarǵan bir shákirtim bar, ol 300 dollarǵa ıe boldy. Al 100 dollar utqan balalar sońǵy on úsh jyldyń ishinde óte kóp. Biraq on úsh jyl qatarynan jasyryp kele jatqan esebimniń bıyl syıaqysy 1300 dollar boldy. Qazirshe eshkim ony shyǵarǵan joq. Ár jyl saıyn esepke 100 dollardan qosylyp otyrady. Bul men usynǵan ózindik noý-haý, – deıdi A.Jumadildaev.

Al bul joly UǴA akademıgi kezekti esebiniń sheshimin tapqan Súleımen Demırel atyndaǵy ýnıversıtettiń 1 kýrs stýdenti Jánııa Keńesovaǵa 100 AQSh dollaryn usyndy. Akademıktiń jasyrǵan esebi – azaıtý amalynyń tepe-teńdik dárejesin esepteý bolsa, Jánııa sol eseptiń besinshi dárejeli tepe-teńdigine sheshim tapty. Azaıtý amalynyń kelesi zańdylyǵyn tabýǵa akademık 500 AQSh dollaryn tigip otyr.

– Men jastarǵa tapsyrǵan eseptiń birde-bireýiniń sheshimin bilmeımin. Sondyqtan ony jastarǵa jasyramyn. Jalpy, eseptiń sheshimin tabýǵa árqalaı ýaqyt ketedi. Jánııa Keńesova bul eseptiń sheshimin bir aptanyń ishinde tapty. Biraq jeńildeý bolsyn dep tapsyrmany asa qatty qıyndatpadym. Maqsatym – balalardyń izdeniske degen qushtarlyǵyn arttyrý, bul azaıtý amalynyń zańdary ǵoı. Barlyǵy qosý amaldaryn kóbirek biledi, azaıtý amalyn eshkim zerttemegen. Sony balalarǵa ádeıi berdim, kórsin dep, úırensin degen nıetpen. Esepti sheshýge on shaqty bala baq synap kórdi, al osy qyzymyzdyń usynǵan sheshimi jańa zańdylyq boldy, besinshi dárejeli tepe-teńdiktiń sheshimin tapty, – deıdi akademık.

Ol sońǵy jyldary jastardyń matematıka ǵylymyna qyzyǵýshylyǵy tómendegenine ǵalym retinde qynjylatynyn aıtady. Sondyqtan jastardy qulshyndyra túsý úshin osyndaı baıqaý uıymdastyryp, óz esebinen yntaly, talantty stýdentterge arnaıy syılyq taǵaıyndaýdy jalǵastyryp keledi.

Búginde ǵalym óz shákirtterin maqtan tutady. Onyń tárbıelegen jastary álemniń Massachýsets, Garvard syndy bedeldi oqý oryndarynda qyzmet atqaryp júr.

Aınash ESALI,

«Egemen Qazaqstan»

ALMATY