Mınıstrdiń aıtýynsha, bul baǵdarlama pasıentke dınamıkalyq baqylanýda bolyp, óz aýrýyn belsendi basqarýǵa, emhana men pasıent arasynda áleýmettik kelisim jasaýǵa jáne mobıldik qosymshalardy qoldanýǵa múmkindik beredi.
Qazaqstanda aýrýlardy basqarý baǵdarlamasy 2013 jyldan bastap úsh nozologııa boıynsha: arterıalyq gıpertenzııa, qant dıabeti, júrektiń sozylmaly jetispeýshiligi boıynsha engizildi.
«2018 jyldyń qorytyndysy boıynsha baǵdarlamaǵa 220 myńnan astam pasıent qosyldy. Bul dıspanserlik esepte turǵan pasıentterdiń 17%-yn quraıdy. 2020 jyldyń sońyna qaraı pasıentterdiń 50% paıyzyn baǵdarlamamen qamtý josparlanǵan», dedi E. Birtanov.
Elbasynyń tapsyrmasy boıynsha, aýrýlardy basqarý baǵdarlamasyn engizgen mamandardy yntalandyrý maqsatynda 2019 jyldyń basynan 36 000 ýchaskelik medısına qyzmetkerleriniń jalaqysyn kezeń-kezeńmen 20% ulǵaıtý josparlanyp, 5,3 mıllıard teńge kózdeldi.
Osyǵan oraı, baǵdarlamaǵa medısına qyzmetkerlerin oqytý jospary qurylyp, 12 648 maman oqytyldy.
Alaıda, keıbir óńirlerde baǵdarlamany oqytý boıynsha tómen belsendilik baıqalady. Mysaly, Jambyl (23%), Soltústik Qazaqstan (25%), Qyzylorda (26%) oblystarynda jospardan 30% tómen maman oqytyldy.
«Qurmetti ákimder, bul baǵdarlamany sapaly engizýge asa kóńil bólý qajet. Ol ınfarkt, ınsýlt sanyn tómendetýge, stasıonarlyq emdeýge shyǵyndardy azaıtýǵa jáne óńirlerde jalpy ólim kórsetkishin tómendetýge múmkindik beredi», deıdi mınıstr E. Birtanov baıandamasynda.
