Premer-Mınıstr Densaýlyq saqtaý mınıstri E. Birtanov pen birqatar óńir ákimderiniń baıandamalaryn tyńdaǵannan keıin, QR Úkimetiniń aldynda halyqqa medısınalyq kómektiń qoljetimdiligin qamtamasyz etý jáne onyń sapasyn jaqsartý — ortaq mindeti turǵanyn atap ótti.
«Bul qazaqstandyqtardyń densaýlyǵyn jaqsartyp, ómir súrý uzaqtyǵy men sapasyn arttyrady. Osy rette halyqtyń alǵashqy medısınalyq kómekke qoljetimdiligi máselesi asa mańyzdy másele», — dep A. Mamın, atalǵan júıedegi problemalardy – alǵashqy býyn dárigerleriniń júktemesiniń aýyr ekenin jáne maman tapshylyǵy bar ekenin atap ótti.
Úkimet «Aýyl – El besigi» jobasy aıasynda jańa áleýmettik standarttardy engizip, aýyldyq jerlerde densaýlyq saqtaý uıymdarynyń qurylysy boıynsha óńirlik standarttar júıesin ázirleýde.
Úkimet basshysy mindetterdi iske asyrý maqsatynda Densaýlyq saqtaý mınıstrligine jáne óńirlerdiń ákimdikterine kelesi baǵyttar boıynsha jumysty uıymdastyrýdy tapsyrdy.
Birinshiden, jańa alǵashqy medısınalyq-sanıtarııalyq kómek nysandaryn ashý arqyly jalpy praktıka dárigerleriniń júktemesin azaıtýdy qamtamasyz etý. Sonymen qatar, bul nysandar qajetti medısınalyq quraldarmen jaraqtandyrylýy qajet.
Qaraǵandy oblysyndaǵy Kóktas aýyly jáne Jambyl oblysyndaǵy Grodekovo aýylynda tıimdi júzege asyrylǵan jobalar atap ótildi. Premer-Mınıstrdiń aıtýynsha, endi osy oń tájirıbe basqa da óńirlerde qoldanylýy kerek.
Ekinshiden, jas mamandardyń aýyldarda turaqty jumys istep, eldi mekenderde qalýyn qamtamasyz etý maqsatynda áleýmettik qoldaý kórsetý máselelerin pysyqtaý qajet.
Mysal retinde Soltústik Qazaqstan jáne Túrkistan oblystarynda jas mamandarǵa joǵary kóterme aqy tóleý, al Batys Qazaqstan jáne Qaraǵandy oblystarynda turǵyn úımen qamtamasyz etý jumysy uıymdastyrylǵany atalyp ótti. Premer-Mınıstr osyndaı bastamalarǵa asa kóńil bólý kerek ekenin aıtty.
Úshinshiden, Elbasynyń tapsyrmasyn tıimdi oryndaý maqsatynda Densaýlyq saqtaý mınıstrliginiń Alǵashqy medısınalyq-sanıtarııalyq kómekti damytý boıynsha is-sharalar josparyn Úkimet deńgeıine kóterý kerek. Densaýlyq saqtaý mınıstrligine bir aı merzimde is-sharalardyń jandandyrylǵan josparyn ákimdiktermen pysyqtap, ony bekitý úshin Premer-Mınıstr Keńsesine engizý tapsyryldy.
