Atyraý halyqaralyq áýejaıynda polısııa qyzmetkeri abaısyzda áıel adamdy aıaǵynan jaraqattap aldy. О́tken juma kúni áýejaıdyń jolaýshylar termınalynda bolǵan osy oqıǵaǵa baılanysty tergeý sharalary aıaqtaldy.
Kezekshilikte turǵan polısııa qyzmetkeri M.M. qarý saqtalatyn bólmede IIM tapanshasynan baıqaýsyzda oq atqan. Bankterdiń biriniń ınkassasııa qyzmetiniń qarýyn tekserý kezinde qarýdan shyqqan oq áýejaı zalynda otyrǵan 38 jastaǵy áıeldiń aıaǵyna tıdi. Zardap shekken áıel aýrýhanaǵa jetkizildi, jaǵdaıy qanaǵattanarlyq.
Al jumys barysynda qarýdy abaısyz qoldanǵan polısııa serjanty men áýejaıdaǵy jelilik polısııa bóliminiń jetekshisi, kóliktegi polısııa bólimi basshysynyń eki orynbasary laýazymdarynan bosatyldy.
QR IIM kóliktegi polısııa departamenti basshysynyń orynbasary Marat Álkenovtiń aıtýynsha, zardap shegýshi áıel qarýdyń kezdeısoq atylyp ketkenin túsinip, narazylyq bildirmegen. Qazir oblystyq aýrýhanynyń aqyly palatasynda em alyp jatyr. Onyń emine qajet shyǵynnyń bárin Kóliktegi polısııa departamenti moınyna alǵan.
«Atyraýdaǵy oqıǵadan keıin elimizdegi barlyq áýejaılar men temirjol vokzaldaryndaǵy arnaıy bólmeler tekserilip, talapqa sáıkestendiriledi», - dedi mınıstrlik ókili.
ATYRAÝ
