Aǵymdaǵy jyldyń eki aıynda shıki munaı óndirisi 13,2 mln tonnany quraǵan. Bul tıisti kezeńmen salystyrǵanda 5,6 paıyzǵa ulǵaıǵan. Munaı óndirisiniń úlesi Atyraý oblysy boıynsha 64 paıyzdy quraıdy (8,4 mln tonna, jylyna +11 paıyz). Aımaqta eń iri óndirýshiler qatarynda «Nort Kaspıan Opereıtıng Kompanı N.V.» fılıaly (Qashaǵan ken orny), «Tengızshevroıl» JShS (Teńiz ken orny), «Embimunaıgaz» AQ, t.b. bar. Munaıdyń 21,9 paıyzy Mańǵystaý óńiriniń enshisine tıesili bolsa (2,9 mln tonna, jylyna 5 paıyz), 7,4 paıyzy Qyzylorda oblysynda óndirilgen (969,8 myń tonna, jylyna −7 paıyz).
Qazaqstan OPEK+ kelisimderiniń qatysýshy retinde naýryz aıynyń ekinshi jartysynan bastap ári Qashaǵan jáne Qarashyǵanaq ken oryndaryndaǵy jóndeý jumystaryna baılanysty munaı óndirisin táýligine 200 myń barrelge deıin azaıtýdy josparlaǵan. Bul jaıynda QR Energetıka mınıstri Qanat Bozymbaev Hıýstondaǵy CERAWeek salalyq konferensııa barysynda málimdegen-di. Osy mejede Qazaqstan OPEK+ kelisimindegi talaptardy da oryndaıtyn bolady.
