Parlament Senaty Ekonomıkalyq saıasat, ınnovasııalyq damý jáne kásipkerlik komıtetiniń keńeıtilgen otyrysynda «Qazaqstan Respýblıkasynyń keıbir zańnamalyq aktilerine Qazaqstan Respýblıkasy ortalyq jáne (nemese) jergilikti atqarýshy organdarynyń fýnksııalaryn básekeles ortaǵa berý máseleleri boıynsha ózgerister men tolyqtyrýlar engizý týraly» zań jobasy qaraldy. Bul týraly Senattyń baspasóz qyzmeti habarlady.
Zań jobasy 100 naqty qadam – Ult Josparynyń ózin-ózi retteý men jergilikti ózin-ózi basqarýdy damytý arqyly azamattardyń sheshim qabyldaý úrdisine qatysý múmkindigin keńeıtýge, memleketke tán emes qyzmetterdi básekelestik ortaǵa jáne ózin-ózi retteýshi uıymdarǵa berýge baǵyttalǵan 97-qadamyn iske asyrý maqsatynda ázirlendi.
Zań jobasymen birqatar zańnamalyq aktilerge ózgertýler men tolyqtyrýlar engiziledi.
Zań jobasynda ortalyq jáne (nemese) jergilikti atqarýshy organdarynyń fýnksııalaryn básekeles ortaǵa berýdiń negizgi maqsattary, qaǵıdattary men tásilderi retteledi. Fýnksııalardy irikteý men básekeles ortaǵa berýdiń negizgi ólshem sharttary, sondaı-aq tártibi belgilengen.
Zań jobasymen memlekettik organdardyń fýnksııalaryn básekeles ortaǵa berýdiń bes tásili usynylady: aýtsorsıng arqyly (memlekettik satyp alý týraly zańyna sáıkes); memlekettik tapsyrma aıasynda (bıýdjet zańnamasyna sáıkes); memlekettik áleýmettik tapsyrys arqyly (memlekettik áleýmettik tapsyrys, úkimettik emes uıymdarǵa arnalǵan granttar men syılyqaqylar týraly zańnamaǵa sáıkes); fýnksııalardy paıdalanýshylar esebinen berý; mindetti múshelikke (qatysýǵa) negizdelgen ózin-ózi retteýdi engizý arqyly.
Zań jobasynda básekeles ortaǵa berilgen fýnksııalardyń monıtorıngi kózdeledi, ony ortalyq jáne (nemese) jergilikti atqarýshy organdar men múddeli tulǵalar júrgizedi. Monıtorıng nátıjeleri boıynsha básekeles ortaǵa berilgen fýnksııalardyń sapasyz júzege asyrylǵany anyqtalǵan jaǵdaıda, fýnksııa qaıtarylýǵa jatady.
Odan basqa, Qazaqstan Respýblıkasynyń Tuńǵysh Prezıdenti – Elbasynyń «Qazaqstandyqtardyń ál-aýqatynyń ósýi: tabys pen ómir sapasynyń artýy» Joldaýynda jarııalanǵan tapsyrmalaryn iske asyrý maqsatynda zań jobasynda memlekettik orta bilim berý uıymdarynyń dene shynyqtyrý-saýyqtyrý jáne sport qurylysjaılaryn múliktik jaldaýǵa (jalǵa) berýdi jáne kiristerdi ózi derbes paıdalaný quqyǵy kózdelgen.
Komıtet sondaı-aq «Bir taraptan EEO pen oǵan múshe memleketter jáne ekinshi taraptan Iran Islam Respýblıkasy arasyndaǵy erkin saýda aımaǵyn qurýǵa alyp keletin ýaqytsha kelisimdi ratıfıkasııalaý týraly» zań jobasyn da qarady.
Zań jobasy 2018 jylǵy 17 mamyrda Astana qalasynda jasalǵan Kelisimdi ratıfıkasııalaýǵa arnalǵan.
Kelisimde Eýrazııalyq ekonomıkalyq odaqqa múshe memleketter men Iran Islam Respýblıkasy arasynda birqatar bekitilgen taýarlarǵa qatysty 3 jyl merzimge preferensııalyq saýda rejımin belgileýdi jáne ózara saýdadaǵy ımporttyq keden bajdaryn tómendetý kózdelgen.
Zań jobalary Palata qaraýyna jiberildi.
