2017 jyly Qarabalyq aýdanynyń ortalyǵynda Chapaev, Karl Marks, Oktıabr kósheleriniń atyn ózgertý týraly sheshim qabyldanǵan edi. Oktıabr kóshesiniń aty Qapan Badyrov bolyp ózgertildi. Biraq Qarabalyq poselkesiniń keıbir turǵyndary «úırenip qalǵan kóshe atyn nege tanymaıtyn adamǵa berdi?» degen narazylyqtaryn da jasyra almaǵan. Kóptegen qarabalyqtyqtardyń asyǵys aıtqan pikirleri M.Gorkıı atyndaǵy Qarabalyq orta mektebiniń 2-synyp oqýshysy Ksenııa Prıhodkonyń zertteý jumysynan keıin basyldy deýge bolady.
Kishkentaı búldirshin burynǵy Oktıabr, qazirgi Qapan Badyrov kóshesinde turady. Ol anasyna «Qapan Badyrovtyń kim bolǵanyn bilgisi, zertteý jumysyn jazǵysy keletinin aıtty. Anasy qarsy bolmaı, qaıta qyzynyń bastamasyn qýana qabyldady. Olar Qarabalyq aýdandyq tarıhı-ólketaný mýzeıine kelip, talantty akter týraly baı ómirbaıandyq materıal tapty.
Qazaq drama teatrynyń irgetasyn qalasqandardyń biri, Qarabalyq aýdanynyń týmasy Qapan Badyrov M.Áýezov atyndaǵy qazaq drama teatrynda 200-den asa rolde oınady. Ol teatr sahnasynda somdaǵan Abaı, Amangeldi, Qobylandy, Naýan haziret sekildi beınelerdi kórermender umytqan joq. Sonymen qatar Qapan 20 kınoda oınady. Ol qatysqan «Dala batyrlary», «Batyl jandar», «Amangeldi», «Jaýynger uly», «Jambyl», «Eńlik gúlder ósken jerde» atty fılmderden kórermen súıikti akterin birden tanıdy.
Kishkentaı Ksenııanyń Qapan Badyrovtyń ómiri men shyǵarmashylyǵyn jan-jaqty baıandaǵan «Meniń kóshem kimniń atynda?» atty ǵylymı jumysy Qostanaı qalasynda ótken mektep oqýshylarynyń T.Dáýletbaev atyndaǵy «Jas urpaqtyń ıntellektýaldyq áleýeti – Qazaqstandy ındýstrıalyq-ınnovasııalyq damytýdyń tabysty kepili» atty ÚSh aımaqtyq konferensııasyna qatysyp, 2-oryn aldy. Ksenııanyń jasqanbaıtyn sheshendik talanty da baıqaldy, ol úshin «Kórermen kózaıymy» syılyǵymen marapattaldy.
Aýdandyq «Aına» gazeti Ksenııa Prıhodkonyń ǵylymı jumysynyń mazmuny men ol arqyly qol jetkizgen tabysyn jarııalaǵannan keıin, kósheniń jańa atyna rıza emes turǵyndar tańyrqasyp qalǵandaı.
Qostanaı
