Oblys ákimi Q. Kósherbaev QR UQK Shekara qyzmetiniń áskerı bólimine jiberiletin 18 jas sarbazdy jóńeltý rásiminde el aǵalary atynan amanatyn aıtty.
«Sizder búgin ásker qataryna attanǵaly otyrsyzdar. Ata-babalarymyzdyń bilektiń kúshimen, naızanyń ushymen qorǵap, bizge amanat etken jeri men el tynyshtyǵyn kúzetý – qasıetti borysh. Tuńǵysh Prezıdentimiz N.Á.Nazarbaev óziniń «Bolashaqqa baǵdar: rýhanı jańǵyrý» atty baǵdarlamalyq maqalasynda: «Bizdiń babalarymyz ǵasyrlar boıy ushqan qustyń qanaty talyp, júgirgen ańnyń tuıaǵy tozatyn ulan-ǵaıyr aýmaqty ǵana qorǵaǵan joq. Olar ulttyń bolashaǵyn, keler urpaǵy- bizdi qorǵady» degen bolatyn. Tarıhta qaısar minezimizben tanylǵan elmiz. Osy rette, jaýǵa taısalmaı toıtarys bergen Jalańtós Bahadúr, Janqoja, Eset, Buqarbaı, Sartaı syndy daraboz batyrlardyń kózsiz erlikteri áli talaı urpaqqa úlgi bolary sózsiz», - dedi ol.
Kezdesýde halqymyzdyń birtýar batyr perzenti Baýyrjan Momyshuly týraly jazýshy Ázilhan Nurshaıyqovtyń jazǵan «Aqıqat pen ańyz» kitaby jas ulandarǵa tabys etildi.
Jıynda oblystyq Qorǵanys isteri departamentiniń bastyǵy Erkinbek Baıbolov pen «QR Qarýly Kúshteriniń ardagerleri» respýblıkalyq qoǵamdyq birlestiginiń Qyzylorda oblystyq fılıaly tóraǵasy Meńdildá Rshaýov el atynan jaýyngerlerge boryshtaryn aman-esen atqaryp, abyroımen elge oralýǵa tilekterin bildirdi.
