Eren tulǵalardyń qatarynan kóringen Aqjúrek erkin kúrespen 1996 jyldan bastap aınalysqan. О́zi de jas kúninen bastap erkin kúrespen aınalysqan ákesi Dostyq ulynyń osy jetistikke jetýi jolynda barlyq múmkindikti jasaıdy. Sol kezdegi on jasar balanyń armany da, maqsaty da qazaq sportyn álemge áıgilep, kók baıraǵyn álem tórinde asqaqtatý bolypty. Aqjúrek bala kúninen tanymal jattyqtyrýshy Shoqan Nádirbekovtiń tárbıesinde bolady. Ol Islam Baıramýkov sııaqty ataqty sportshyny da baptap, alamanǵa qosqan azamat. Al 2008 jyly Shoqan Nádirbekov ómirden ótken soń, ol aqtóbelik jattyqtyrýshy Baýyrjan Nurmahanovtyń Almaty qalasyndaǵy úıinde jatyp, 2010 jyldan 2012 jylǵa deıin London Olımpıadasyna daıyndaldy. Osy jolda kezdesken qıyndyqtarǵa qaramaı, aldyna maqsat qoıǵan batyr ul jeńis tuǵyrynan kórinýdi maqsat tutady. «Bul Olımpıadaǵa joldama alý ońaı bolǵan joq. Elimizdiń atynan qatysatyn uly báseke bolǵan soń, oǵan úlken daıyndyq kerek. London Olımpıadasyna joldama alý úshin elimizdiń atynan qatysatyn ıakýt ultynyń ókili Leonıd Spırıdonovpen baq synastym. Nátıjesinde basymdyq meniń paıdama sheshilip, London Olımpıadasyna bardym. Elimizdiń atynan osyndaı jarysqa qatysyp, júlde alǵanymdy maqtanysh sanaımyn», deıdi Aqjúrektiń ózi.
Qazaqstannyń tórt dúrkin chempıony, birneshe dúrkin halyqaralyq birinshilikterdiń jeńimpazy, Azııa chempıony Aqjúrek Tańatarovtyń da sport jolynda qıyndyqtar kóp bolypty. «Baq shaba ma, bap shaba ma» degendeı, London Olımpıadasynyń aldynda Beıjińge barmaq bolǵan onyń joly bola qoımaıdy. «Áýel basta lısenzııany kim alsa da, ózara aıqasta jeńgenderiń Olımpıadaǵa barasyń delingen. Sheshýshi aıqas Reseıde ótetin boldy. Onda salmaq ólsheý rásimi ótetin kúni Leonıd kelip turyp, «qazir kelem» dep joq boldy da, aqyry jarysqa qatyspady. Ol jarysta jeńiske jetip, Beıjińge men baratyn boldym. Sol kezde ózimizdiń oblystyq ákimdikten quttyqtaý alyp, qýanyshym qoınyma syımaı, shattanǵan edim. Olımpıadaǵa tyńǵylyqty daıyndyq jasap júrgende ulttyq qurama basshylary Beıjińge Leonıd Spırıdonovtyń baratynyn aıtty. Al men 66 kılo salmaqta el qorjynyna medal salamyn dep aldyma maqsat qoıǵan edim. Shoqan Nádirbekovteı nar aǵamnyń júıkesine osy kezde salmaq tústi. Osy jyly Shoqan aǵa baqılyq boldy», deıdi Aqjúrek. Keıin London Olımpıadasynda da ol ádiletsizdikke jolyǵady. Beldesý kezinde dara sportshyǵa tán emes qýlyqpen úndis Sýshıl Kýmardyń Aqjúrektiń qulaǵyn qyrshyp alǵanyn dúıim jurt biledi. Tipti oǵan orynnyń ádil berilmegeni de aıtylǵan. Sonda da ol naǵyz er-azamatqa tán sabyrlylyqpen aıqasty.
London Olımpıadasynan qola júlde enshilep kelgen Aqjúrek erkin kúresten qol úzgen joq. Qaıta óziniń naǵyz babynda ekenin kórsetip, 2017 jyly Úndistan memleketinde ótken Azııa chempıonatynda chempıon boldy. Sol jyly Parıjde ótken Álem chempıonatynda qola júlde aldy. Munyń bári de talaı jylǵy etken eńbektiń, tókken terdiń óteýi ekeni anyq.
Búgingi tańda Aqjúrek Tańatarov basqaratyn №5 Jambyl oblystyq mamandandyrylǵan balalar-jasóspirimder sport mektebinde 850 bala jattyqsa, olardy jattyqtyratyn 35 jattyqtyrýshy bar. «Men bala kúnimnen Baýyrjan Momyshuly atamyzdy ózime úlgi tutyp kelemin. Ol kisiniń árbir ataly sózi men úshin ómirlik temirqazyq. Biz jaýynger halyqtyń urpaǵymyz. Qan maıdanda nemispen alysqan, ómir men ólim arasynda shaıqasqan Baýyrjan atamyz sııaqty talaı erler ótken. О́zim ylǵı da túrli ult ókilderimen beldesý aldynda babalarymyzdyń batyrlyǵyn esime alamyn. Sodan boıyma rýh qonyp, kóp jaǵdaıda jeńiske jetemin. Búginde ózim basshylyq jasap otyrǵan mekteptiń jattyǵýshylaryna babalarymyzdyń batyrlyǵy men erligi týraly kóp aıtamyn», deıdi Aqjúrek bizben suhbatynda.
Aqjúrek alǵan asýlardyń búginde alty Alashqa aıan bolǵany belgili. T.Rysqulov aýdanynyń Qumaryq aýylynda dúnıege kelip, bala kúninen qazaq sportyn álemge áıgileýdi maqsat etken qaısar ul maqsatyna jetti. Talaı myqtyny tize búktirip, ult rýhyn moıyndatty. Erkin kúres dese ishken asyn jerge qoıatyn Aqjúrektiń ulttyq sportqa degen qoldaýy bir tóbe. 2012 jyly Býdapeshtte ótken Álem chempıonatynda úshinshi oryn alǵan Meıirjan Ashırov pen Túrkııada jastar arasynda ótken Álem chempıonatynda taǵy da úshinshi oryn alǵan Nursultan Naızabekov sııaqty áýlıeatalyq jas sportshylarǵa qoldaý kórsetip, ekeýine óz esebinen eki avtokólik syılaǵany da el esinde. Sonymen qatar sportty damytý maqsatynda arnaıy qor ashyp, jastarǵa qarjylaı qoldaý kórsetip keledi. Bul da halqymyzdyń boıyndaǵy batyrlyqpen, erlikpen, jomarttyqpen ushtasyp jatqan kórinis. Sóz sońynda Aqjúrek Tańatarov qolynan kelgenshe jas sportshylarǵa qoldaý kórsete beretinin, keleshek Olımpıada jeńimpazdaryn daıyndaý úshin aıanbaıtynyn jetkizdi.
