«Qazaqstan» sport saraıynyń salynǵanyna jaqynda 19 jyl boldy. Ol 2001 jyldyń naýryzynda ashylǵan bolatyn. Osy ýaqyt aralyǵynda munda kúrdeli jóndeý múlde júrgizilmegen.
2017 jyldyń qazanynda «Qazaqstan» SS «Astana» áleýmettik-kásipkerlik korporasııasy (ÁKK)» AQ-nyń basqarýyna berilgen bolatyn. Basqarýshy kompanııa ǵımaratty tehnıkalyq zertteýden ótkizdi. Onyń nátıjesinde birqatar júıeniń kúrdeli jóndeýdi talap etetindigi anyqtaldy.
Máselen, basseınniń jumysyn totatýǵa týra keldi. «Astana» áleýmettik-kásipkerlik korporasııasy» AQ basqarýshy dırektory Halel Ákimjanovtyń aıtýynsha, sarapshylar basseınniń jaǵdaıyn apattyq dep baǵalap otyr.
«Negizgi problema – basseın shuńqyryndaǵy usaq jaryqtardyń kóptigi. Gıdroızolıasııa jańartylmaǵan, sý birtendep ótip, tirek qurylymdardyń buzylýyna, basseın shuńqyrynyń tottanýyna sebep bolǵan. Shuńqyr sý qysymynan «jınalyp», adamdar zardap shegýi múmkin edi. Tıisinshe biz kelýshilerdiń qaýipsizdigi úshin basseın jumysyn ýaqytsha toqtattyq», – dep túsindirdi Halel Ákimjanov.
Budan bólek, shatyr qurylymdaryn ustap turatyn ústińgi jabyn fermalarynyń keıbiri deformasııalanǵan.
«Bul qardyń tóbege túsiretin salmaǵy shekti normatıvten asyp ketkendigin bildiredi. Metalldyń tozǵandyǵy sonshalyq, aldaǵy ýaqytta tóbeniń qulap ketýine alyp kelýi múmkin», – deıdi Ákimjanov.
«Salmaq túsetin emes, ekinshi kezektegi qurylymdar buzylǵan. Desek te, olardy ne bekitý, ne aýystyrý kerek. Mundaı jaǵdaı ústińgi jabyn men saraıdyń muz aıdyny ústindegi tóbede de oryn alýda. Tehnıkalyq qorytyndyǵa sáıkes, bul – 3-shi sanattaǵy jaǵdaı. Ol qaǵanattarlyq jaǵdaı bolyp esepteledi. Biz monıtorıngti únemi júrgizemiz. Alaıda saraı jóndeý jumystaryn talap etedi», – dep atap ótti Halel Ákimjanov.
Onyń aıtýyna qaraǵanda, basqarýshy kompanııa kelýshilerdiń múddelerin qanaǵattandyrý maqsatynda tıisti sharalardyń barlyǵyn júzege asyrýda. Kompanııa basshylyǵy abonementter baǵasynyń ár túrli ekendigine qaramastan, kúshin joımaǵan «Qazaqstan» sport saraıy basseınine kelý abonementi, tipti bir rettik abonementi bar azamattar úshin «Barys Arena» KMS-daǵy basseınge sol sharttardyń negizinde kelý múmkindigin usynyp otyr. Basseınge kelý abonementteriniń merzimi shektelmegen. Bul sabaqtardy jóndeý jumystary aıaqtalǵanǵa deıin jańartýǵa múmkindik beredi.
«Qazaqstan» SS – turǵyndar úshin mańyzdy áleýmettik nysan. Ony halyqqa arnalǵan qaladaǵy eń qoljetimdi keshen dep ataýǵa bolady. Elordadaǵy basqa basseındermen salystyrǵanda, munda azamattar kóp keledi. Bárinen buryn qaýipsizdik qamtamasyz etilýi tıis. Adamdar munda kelýge úırenip qalǵan. Ol úshin alańdaıdy. Halyq arasynda saraıdyń jabylatyndyǵy, súreletindigi, onyń ornynda saýda úıiniń salynatyndyǵy týraly qaýesetter bar. Munyń barlyǵy da jalǵan aqparat ekendigin aıtqym keledi. Jóndeý jumystary aıaqtalǵan soń, sport saraıy burynǵydaı azamattar úshin jumys isteıtin bolady», – dep sendirdi «Astana» áleýmettik-kásipkerlik korporasııasy» AQ ókili.
Desek te, bul jalǵyz problema emes. Saraıdaǵy kommýnıkasııalar tozǵan, tóbeden sý aǵady, keı jerlerde qaptaýysh materıaldar qulap jatyr. Ǵımarat tolyqtaı kúrdeli jóndeýden ótýi kerek. Osyǵan oraı sport saraıynyń qyzmeti kúrdeli jóndeý jumystary aıaqtalǵanǵa deıin toqtatylýy múmkin.
«Bul jaǵdaı kóp jyldar boıy kúrdeli jóndeýdiń júrgizilmeýiniń nátıjesinde qalyptasyp otyr. Saraı árdaıym sharýashylyq esepte boldy. Biz kiris esebinen ǵımaratty ózimiz tıisti jaǵdaıda ustaýǵa tyrystyq. О́z kúshimizben kosmetıkalyq, aǵymdyq jóndeý jumystaryn júrgizdik. Alaıda munyń barlyǵy jetkiliksiz», – deıdi sport saraıynyń dırektory Erbolat Aqanov.
Halel Ákimjanovtyń aıtýynsha, jobalyq-smetalyq qujattamany ázirleýge shamamen jarty jyl kerek. Budan keıin usynylǵan jobalyq sheshimderge, jumys kólemine jáne olardyń qunyna baılanysty qarjylandyrý kózderi men kúrdeli jóndeýdi júrgizý merzimine qatysty sheshimder qabyldanatyn bolady.
