Týmysynan aıryqsha talantty Saqqulaq bı 15 jasynda daýǵa aralasyp, ádil bılik aıtyp, tórelik etken. Sol zamandaǵy qısapsyz dúnıeden, rýhanı mol muradan keıingige qalǵany juqanasy ǵana. Máselen, Saqqulaq bıdiń Shoqanǵa bergen batasy, «Aqyl», «Tórt nárseden qashyq qyl», «Bul da bir ǵalymnyń biri edi-aý», «Shyńǵysqa kóńil aıtýy», «Ǵylym», «Baıdaly bıge aıtqany», «Musanyń ajalynda aıtqany» tárizdi mándi de máıekti sózderi saqtalyp qalǵan. Sheshen sózinde tereń fılosofııalyq oı, bilim, ómirge degen qushtarlyq, eldik pen erlikti kókseý jatyr.
О́ziniń el birligin saqtaý, keıingi urpaqty ǵana emes, zamandastaryn da ádildikke, adaldyqqa, arlylyqqa tárbıeleý baǵytynda aıryqsha eńbek etken Saqqulaq bı 1888 jyly ómirden ozady. Shańyraǵynda jeti ul dúnıege kelgen. Olardyń ishinde áke jolyn qýǵany Nuraly men Eraly esimdi balalary.
Saıyn sahara tósinde ádildik týyn jelbiretken, qara qyldy qaq jarǵan jaryqtyq Saqqulaq bıdiń kesenesi shıki kirpishten salynǵan, segiz qyrly kúmbez pishinde. Segiz buryshtyń ońtústik batys jaǵynda tómengi eki qatardyń kirpishi sál-pál buzylǵan eken, qalǵan qabyrǵalary tutas saqtalǵan. Urpaqtarynyń aty jazylǵan eski tastyń janyndaǵy qabyrǵanyń tusynda Saqqulaq bıdiń óziniń jáne eki ulynyń attary tańbalanyp, qabir ústine eskertkish ornatylǵan.
Ár belesi kóne tarıhqa bógip jatqan ejelgi Ereımendegi eldiń keshegi ótken kúnin, onyń jaqsysy men jaısańynyń izgi muratyn aıǵaqtaıtyn kóne kesene qazirgi kúni de ókpek jolaýshyǵa oı salyp, qııannan kózge túsedi.
Aqmola oblysy,
Ereımentaý aýdany
