Quramynda fılmniń bas rejısseri Rústem Ábdirashev, bas prodıýseri Arman Asenov, dıalog mátinderiniń avtory Erlan Tóleýtaı jáne basty rólderdi somdaýshylar Qaırat Kemalov, Nııazbek Shaısultanov, Ǵazızatańsholpan Tileýbaı, Meırhat Amangeldi bar shyǵarmashylyq topty Qaraǵandy oblysy ákiminiń orynbasary Ashat Aımaǵambetov qarsy aldy.
Shyǵarmashylyq top kenshiler astanasynda «Saryarqa» jáne «Qaraǵandy-1» telearnalaryna suhbat berip, BAQ ókilderimen baspasóz máslıhatyn ótkizdi.
Kezdesýler barysynda rejısser Rústem Ábdirashov «Altyn taq» fılminiń «Qazaq handyǵy. Almas qylysh» kınoepopeıasynyń jalǵasy ekenin atap ótti.
– Kartınany túsirýge 500-den astam adam jumyldyryldy. Rólderdi oryndaýshylardy Qazaqstannyń birneshe oblysynan jınadyq. Buǵan qosa, fılmde Mońǵolııa, Qytaı jáne Irannan kelgen akterler oınady. Sonymen qatar, túsirilimdi uıymdastyrýǵa arnaıy qurylǵan birneshe departament at salysty, – dedi R.Ábdirashev.
Aıta ketý kerek, fılmnyń túsirilýine súbeli úles qosqandardyń arasynda eki qaraǵandylyq azamat boldy. Olar – Sáken Seıfýllın atyndaǵy qazaq drama teatrynyń ártisi, Qazaqstannyń eńbek sińirgen qaıratkeri, atalǵan fılmde Kereı hannyń rólin somdaǵan Qaırat Kemalov pen dıalogtar avtory, ónertanýshy Erlan Tóleýtaı.
– Kereı han róline bekitilgenimdi estigende qatty qýanǵanym ras. Biraq meniń bul qýanyshym uzaqqa sozylmady. Sálden soń men jobanyń qanshalyqty aýqymdy ekenin túsingende, jaýapkershilik sezimi paıda boldy. Tipti boıymdy úreı bıledi desem de bolady. Men teatrda 40 jyl jumys isteımin, biraq kınonyń erekshiligi múldem basqa. Túsirilim bastalǵan soń 10 kún ótken soń baryp barlyǵy oıdaǵydaı júre bastady. Alǵashqy ýaqytta maǵan tájirıbeli kınoakterler kómektesti, – dedi Qaırat Kemalov.
Sondaı-aq, «Qazaq handyǵy. Altyn taq» fılminiń shyǵarmashylyq toby Qaraǵandy oblysynyń ákimi E.Qoshanovtyń qabyldaýynda boldy.
