Qazirgi tańda aýdan ortalyǵynda atalǵan sanatqa jatatyn 30 otbasy bar. Árbir muqtaj otbasy bul dúkennen 40 kıloǵa deıin azyq-túlik túrlerin ala alady. Olar aıyna bir ret dúkenge kelip, ózderine qajetti zattardy alýǵa quqyly. Sondaı-aq, atalǵan otbasylar áleýmettik dúkenge baryp, birinshi kezektegi qajetti taýarlardy alýǵa ótinim de qaldyra alady.
Negizi, áleýmettik dúken aýdandyq jumyspen qamtý bólimi bekitken tizimge sáıkes tutynýshylarǵa qyzmet kórsetedi. Tizim ár saıyn jańartylyp, tolyqtyrylyp otyrady.
Áleýmettik dúkenge taýarlar demeýshiler arqyly túsedi. Mysaly, «Sherýbaı-Sý» JShS kartoppen qamtamasyz etse, «Aqtileý» qaıyrymdylyq qory men basqa da janashyr azamattar óz qarajattaryna satyp alǵan azyq-túlik ónimderi men kıim-keshek usynady. Búgingi kúnde dúkende 5 aıǵa jetetindeı qor bar. Aıta ketý kerek, áleýmettik dúkenge arnalǵan oryndy kásipker Rahmetqalı Mýsahanov «BAQ» saýda ortalyǵy ishinen tegin usynǵan.
– Dúkende balalardyń aıaq kıimi men kıimi, sondaı-aq azyq-túlik bar. Mysaly ózim 4 jasar qyzym úshin kúrteshe men aıaq kıimdi tegin aldym. Biz kentimizde osyndaı dúkenniń ashylǵanyna óte qýanyshtymyz, – deıdi kóp balaly ananyń biri Indıra Berikbosynova.
Shet aýdanynyń ákimi Marat Jandáýletovtiń aıtýynsha, aldaǵy ýaqytta mundaı tegin dúkender Aqadyr, Aqjal, Moıynty aýyldarynda jáne S. Seıfýllın atyndaǵy kentte paıda bolmaqshy.
Qaraǵandy oblysy
