Otandyq sportshylarǵa qoldaý kórsetip, álemge tanytýdy maqsat etken bul promoýterlik kompanııa ótken jyly qurylǵan. Az ýaqyttyń ishinde AQSh-tyń iri promoýterlik kompanııalarymen iskerlik baılanys ornatqan «SULEIMEN Promotions»-tiń quramynda Aıdos Erbosynuly, Nursultan Jańabaev sekildi sharshy alańnyń sheberleri bar. Jaqynda Almatyda kásibı boks keshin joǵary dárejede uıymdastyrǵan ujym bul bastamany Atyraýda jalǵastyrýdy josparlap otyr.
- Jastar arasynda kásibı boksty damytyp, nasıhattaý baǵytynda promoýterlik kompanııamen kelisim-shartqa otyrdyq,-deıdi oblystyq dene shynyqtyrý jáne sport basqarmasynyń basshysy Rınat Ibragımov. –Bolashaǵynan úmit kúttiretin jastar bar. Endi talapty sportshylarǵa shetelge baryp, promoýterlermen baılanys ornatýdyń qajeti bolmaıdy, osy kelisim-shart arqyly balalar kásibı boksshylardan tikeleı tálim alady.
Kompanııa quramyndaǵy bylǵary qolǵap sheberleri Aıdos Erbosynuly men Nursultan Jańabaev atyraýlyq jas sportshylarǵa sheberlik saǵattaryn ótkizip, jattyǵýlaryna qatysady. Alǵashqy kezdesý Mahambet aýdanyndaǵy balalar men jasóspirimder sport mektebinde ótti. «Men alǵash boks úıirmesine 15 jasymda keldim. Qazir búkilálemdik boks assosıasııasy (WBA) reıtınginde 10 orynda turmyn. Bar bilgenimdi úıretý-boryshym. Balalardyń sportqa degen qyzyǵýshylyqtaryn kórip, qýanyp turmyn. Bizdiń qolymyzdan keledi»,-deıdi Nursultan Jańabaev.
Sheberlik saǵattary oblys ortalyǵyndaǵy mamandandyrylǵan boks klýbynda ótedi.
