Iá, dál solaı.
3 sáýir kúni shahardaǵy №15 mekteptiń 6 synyp oqýshysy Dosjan Dýlatulynyń óz aýlasynan túsirgen vıdeosy áleýmettik jeli arqyly jedel taraǵan edi. 3 mınýttyq vıdeoda ol ózi turatyn úıdiń aýlasyndaǵy ábden eskirip, tozǵan, synǵan oryndyqtar men sporttyq qurylǵylardy, jaramsyz bolyp, aýlanyń bir buryshynda jatqan átkenshekti kórsetip: ««Dvor osyndaı jaman. Balalar oınaǵysy keledi. Oınaıtyn túk te joq. ...Jaqsylap dvor isteý kerek osy jerge. Maıakovskıı 20 kóshesinde osyndaı jaman dvor. Nege jóndemeıdi? Men sony aıtqym keledi. ... Balalar oınaıyn dese oınaı almaıdy. Úıde otyrady qamalyp» (sózin sol qalpynda berip otyrmyz – A.Q) dep janaıqaıyn jetkizgen-di.
Qorshaǵan ortasyna beı-jaı qaramaıtyn batyl oqýshynyń bul áreketi oblys ortalyǵynyń basshylyǵynyń da nazarynan tys qalmapty. Vıdeo jarııalanǵan kúnniń erteńinde, ıaǵnı 4 sáýir kúni О́skemen ákimi Jaqsylyq Omar qol astyndaǵy qyzmetkerlerimen birge Maıakovskıı kóshesindegi 20 úıge arnaıy kelip, Dosjannyń arqasynan qaǵyp, alǵysyn bildirip, aýlany qala bıýdjetinen únemdelgen qarajat esebinen jóndetýge ýáde bergen-di. Aýlany bıýjet esebinen de jóndeýge bolady eken. Alaıda aýlaǵa tıesili úıdiń PIK-i ótken jyly ótinishti durys bermeı, aýla jóndeletin aýlalardyń tizimine kirmeı qalǵan kórinedi.
Búgin biz óz aýlasynan reportaj jasaǵan oqýshynyń ata-anasyna telefon shalyp, ákesi Dýlatpen jáne Dosjannyń ózimen az-kem áńgimelestik.
-Vıdeony ulyńyz ózi túsirgen be? Álde bireýler «túsir» dep aıtty ma eken?
- Joq. Úıdiń mańynda oınap júrip túsirip, ınternetke jibergen ǵoı. HHI ǵasyrdyń balalary emes pe? Bárin biledi.
- Áıteýir mektepte eshkim uryspap pa?
-|Joq, eshkim uryspapty. Men de oılaǵam, «munyń ne?» dep ursatyn shyǵar dep. Biraq endi ursatyndaı eshteńe istegen joq qoı. Túsirgeniniń bári ras. О́zi áýelde kishkene qoryqty. «Qoryqpa, eshteńe búldirgen joqsyń» dedik. Ulym mektepte úzdik oqıdy. Regbıge qatysady. Qaryndasy bar, dostary bar, bári esik aldyna oınaýǵa shyǵady. Biraq aýlada oınamaıdy, basqa aýlaǵa ketip qalady. Izdeımiz. «Osy dvor sharshatty. Túk joq» dep aıtyp júretin únemi.
-Sonda bul aýla múlde jóndelmegen be?
- Múlde jóndelmegen ǵoı. Bári synyp jatyr. Biz bul jerge 2011 jyly kóship kelgenbiz. Sol ýaqyttan beri osylaı. Balalar osy aýlada oınaýǵa májbúr. Bizdiń PIK «aýlany jóndetýge ótinish bergenbiz» deıdi. Jalpy bul jerdiń PIK-i durys jumys istemeıdi. Olardyń jumysy bolsa da, 1 qabattaǵy podezdi ózim jasap, ózim syrlaǵanmyn.
Oqýshynyń ákesi Dýlat Ýanovtyń aıtýynsha, bul aýlada bir emes, 4 úı bar eken. Dýlat áskerı qyzmet atqarsa, anasy medbıke bolyp jumys isteıdi eken. Oqýshynyń ózimen de sóılesip, pikirin tyńdadyq.
-Dosjan batyr, túsirgen vıdeońdy kórdik. Daıyn turǵan jýrnalıst ekensiń. Vıdeony óziń túsirdiń ǵoı.
- Úsh-tórt kún buryn túsirgem. Internetke, Vk men feısbýkke jiberdik.
- Muny qala ákimi kórsin dep túsirdiń be? Álde jaı túsire saldyń ba?
- Ústidegi adamdarǵa, basshylarǵa jibergem. Internetke salǵam. О́zderi kórdi. Keshe qala ákimi keldi. «Isteımiz. Jaraısyń!» dedi.
-Mektepte eshkim urysqan joq pa?
- Joq.
-Sonda sen buǵan deıin basqa aýlalarǵa baryp oınap júrdiń be?
- Iá, Ekinshi úıdiń aýlasyna baryp júrmiz. Ol jaqta fýtbol alańy bar.
